කාලගුණ විද්යා දෙපාර්තමේන්තුව විසින් දිවයිනේ දිස්ත්රික්ක 17ක් ආවරණය වන පරිදි තාප දර්ශකය ඉහළ යාම පිළිබඳව කහ පැහැති අවවාදාත්මක නිවේදනයක් නිකුත් කර තිබේ. හෙට (මැයි 3) දිනයේදී උතුරු, උතුරු මැද, නැගෙනහිර, සබරගමුව සහ වයඹ යන පළාත්වලට මෙන්ම කොළඹ, ගම්පහ සහ මොනරාගල දිස්ත්රික්කවලටද මෙම තාප දර්ශකය අවවාදාත්මක මට්ටමක පවතිනු ඇතැයි අපේක්ෂා කෙරේ. මෙම තාප දර්ශකය යනු සාපේක්ෂ ආර්ද්රතාවය සහ උපරිම උෂ්ණත්ව දත්ත උපයෝගී කරගනිමින් මිනිස් සිරුරට දැනෙන උෂ්ණත්වය ගණනය කිරීමක් මිස නිරපේක්ෂ උෂ්ණත්වයම නොවන බව කාලගුණ විද්යා දෙපාර්තමේන්තුව පෙන්වා දෙයි.
උණුසුම් කාලගුණික තත්ත්වයන් හේතුවෙන් ඇතිවිය හැකි සෞඛ්ය ගැටලු අවම කර ගැනීමට පූර්වාරක්ෂාවන් අනුගමනය කරන ලෙස මහජනතාවගෙන් ඉල්ලා සිටී. විශේෂයෙන්ම එළිමහනේ සේවයේ නිරත පුද්ගලයින් නිතර ජලය පානය කිරීමටත්, සෙවණ සහිත ස්ථානවල විවේක ගැනීමටත් වගබලා ගත යුතුය. ගෘහස්ථව රැඳී සිටින අය වයෝවෘද්ධ සහ රෝගී පුද්ගලයින් පිළිබඳව වැඩි අවධානයක් යොමු කළ යුතු අතර, දහවල් කාලයේදී වෙහෙසකර එළිමහන් ක්රියාකාරකම් සීමා කරන ලෙසද උපදෙස් ලබා දී ඇත. ළමුන් කිසිවිටෙකත් රථවාහන තුළ තනිව තබා නොයන ලෙසත්, සැහැල්ලු සහ ලා පැහැති ඇඳුම් ඇඳීමෙන් සහ ශරීරයේ ජල මට්ටම ප්රමාණවත්ව පවත්වා ගැනීමෙන් තාප ආශ්රිත රෝගවලින් ආරක්ෂා විය හැකි බවත් පාරිසරික අංශ අවධාරණය කරයි.
