ශ්රී ලංකා භාණ්ඩාගාරයේ ඊමේල් පද්ධතියට අනවසරයෙන් ඇතුළු වී (Hacking) ඇමරිකානු ඩොලර් මිලියන 2.5ක මුදලක් වංචා කිරීමේ සිද්ධිය සම්බන්ධයෙන් විමර්ශන සඳහා ඇමරිකානු මධ්යම විමර්ශන කාර්යාංශයේ (FBI) සහාය ලබා ගැනීමට අපරාධ පරීක්ෂණ දෙපාර්තමේන්තුව (CID) පියවර ගෙන තිබේ. ජාත්යන්තර මට්ටමේ සයිබර් අපරාධයක් ලෙස සැලකෙන මෙම සිද්ධිය විමර්ශනය කිරීම සඳහා ඇමරිකානු සයිබර් ආරක්ෂණ සමාගමක සහ ඕස්ට්රේලියානු බලධාරීන්ගේ ද සහාය ලබාගෙන ඇති බව වාර්තා වේ.
මූල්ය වංචාවට අමතරව, විදේශ ණය පියවීමට අදාළ සංවේදී ලේඛන කිහිපයක් ද මෙම සයිබර් අපරාධකරුවන් විසින් සොරාගෙන ඇති බවට භාණ්ඩාගාරය සැක පළ කරයි. මෙම ප්රහාරය පිළිබඳව මුදල් අමාත්යාංශය ජනවාරි මාසයේ සිට දැනුවත්ව සිටියද, ඒ පිළිබඳ නිල පැමිණිල්ලක් CID වෙත ඉදිරිපත් කර ඇත්තේ මාර්තු 28 වනදාය. වංචා කරන ලද මුදල් පවතින ස්ථානය හෝ මෙයට සම්බන්ධ පුද්ගලයන් පිළිබඳව මෙතෙක් අනාවරණය වී නොමැති අතර, මහ බැංකුවේ මූල්ය බුද්ධි ඒකකය ද මේ සම්බන්ධයෙන් පුළුල් මෙහෙයුමක් ආරම්භ කර ඇත.
මේ අතර, ප්රංශ ණය ලේඛන අතුරුදන් වී ඇති බවට පළවන වාර්තා මුදල් අමාත්යාංශය ප්රතික්ෂේප කර සිටියි. කොළඹ කොටුව මහේස්ත්රාත් අධිකරණයේ අවසරය මත මෙම සයිබර් මංකොල්ලය පිළිබඳ සොයා බැලීමට විශේෂඥ කමිටුවක් ද පත් කර ඇති අතර, ඉදිරියේදී සිදුවන සියලු මූල්ය හුවමාරුවලදී දත්ත දැඩි ලෙස පරීක්ෂා කිරීමට අදාළ අංශ වෙත උපදෙස් දී තිබේ.
