ශ්රී ලංකා රජය විසින් ඔස්ට්රේලියාවට ගෙවීමට තිබූ ණය මුදලකින් ඇමරිකානු ඩොලර් මිලියන 2.5ක මුදලක් අදාළ ණයකරුට නොව වෙනත් පාර්ශ්වයකට ගෙවා ඇති බව විපක්ෂ නායක සජිත් ප්රේමදාස මහතා අද (05) පාර්ලිමේන්තුවේදී අනාවරණය කළේය. ආණ්ඩුක්රම ව්යවස්ථාවේ 148 ව්යවස්ථාව ප්රකාරව රාජ්ය මූල්ය පාලනය පාර්ලිමේන්තුව සතු බැවින්, මෙම අතිවිශාල මූල්ය අක්රමිකතාව සම්බන්ධයෙන් රජය වහාම පැහැදිලි කිරීමක් කළ යුතු බව ඔහු අවධාරණය කළේය.
ගෙවීම් 10ක් හරහා මෙම ඩොලර් මිලියන 2.5ක මුදල අහිමි වී ඇති බවත්, ඔස්ට්රේලියානු ආයතනයේ නිල ඊමේල් ලිපිනයට සමාන ව්යාජ ලිපිනයකින් ලැබුණු උපදෙස් මත ගෙවීම් විස්තර වෙනස් කර ඇති බවත් හෙළි විය.
මෙයට අමතරව ඇමරිකානු තැපැලට ගෙවූ ඩොලර් ලක්ෂ 6ක ගැටලුවක්, අස්වැසුමේ දෙවරක් ගෙවීම් සිදුවීම සහ ප්රංශ රජයෙන් ලබාගත් ණයකට අදාළ පත්රිකා අතුරුදන් වීම පිළිබඳව ද ඔහු ප්රශ්න කළේය.
ජනවාරි මාසයේ අනාවරණය වූ මෙම සිදුවීම පාර්ලිමේන්තුවට වාර්තා නොකර රජය මගහැරියේ මන්දැයි විමසූ ඔහු, මේ පිළිබඳව අපරාධ පරීක්ෂණ දෙපාර්තමේන්තුවට පැමිණිලි කිරීමට ප්රමාද වීම ගැන ද ප්රශ්න කළේය.
මුදල් අමාත්යාංශයේ ලේකම් ඇතුළු ප්රධාන නිලධාරීන් සිය වගකීම් පැහැර හැර ඇති බවත්, ඔවුන් තවදුරටත් තනතුරුවල රඳවාගෙන ස්වාධීන පරීක්ෂණයක් කළ නොහැකි බවත් විපක්ෂ නායකවරයා පවසා සිටියේය.
මෙම මුදල් අස්ථානගත වීමත් සමඟ ජාත්යන්තර මූල්ය අරමුදල (IMF) සමඟ ඇති ගිවිසුම ප්රකාරව “තාක්ෂණික ණය පැහැර හැරීමක්” සිදුවී ඇත්නම්, ඉන් මිදීමට රජය ගෙන ඇති පියවර ඉදිරිපත් කරන ලෙස ද සජිත් ප්රේමදාස මහතා වැඩිදුරටත් ඉල්ලා සිටියේය.
