ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ හදිසි මරණයට හේතුව නිශ්චිතවම අනාවරණය කර ගැනීම සඳහා ඔහුගේ සිරුරු කොටස් රජයේ රස පරීක්ෂකවරයා වෙත යොමු කර තිබේ. කොල්ලුපිටිය ප්රදේශයේ නිවසක තිබී ඉකුත් සිකුරාදා (08) උදෑසන ඔහුගේ මළ සිරුර හමුවූ අතර, එය ගෙල වැළලාගෙන සිදුකරගත් මරණයක් බවට මුලින් සැක කෙරුණි. කෙසේ වෙතත්, මෙම මරණය සම්බන්ධයෙන් පවතින සැකසහිත තත්ත්වයන් හේතුවෙන් විමර්ශන කටයුතු කොළඹ අපරාධ කොට්ඨාසය වෙත භාර දී ඇති අතර විද්යාත්මක සාක්ෂි ලබා ගැනීම සඳහා මෙලෙස සිරුරු කොටස් පරීක්ෂණ සඳහා යොමු කර ඇත.
කොටුව මහේස්ත්රාත් පසන් අමරසේන මහතාගේ නියෝගයකට අනුව, කොළඹ ප්රධාන විශේෂඥ අධිකරණ වෛද්ය නිලධාරී ශ්රියන්ත අමරරත්න මහතාගේ සභාපතිත්වයෙන් යුතු පංච පුද්ගල විශේෂඥ කමිටුවක් මගින් පශ්චාත් මරණ පරීක්ෂණය අද (09) පෙරවරුවේ සිදු කරන ලදී. මෙහිදී ශරීරයේ අභ්යන්තර කොටස් සහ පටක සාම්පල ලබාගෙන ඇති අතර, රසායනික පරීක්ෂණ වාර්තාව ඉදිරි දින කිහිපය තුළ ලබා දීමට නියමිත බව පොලිසිය පවසයි. මෙම විද්යාත්මක වාර්තාව මගින් මරණය ස්වභාවික හේතුවක් ද, සියදිවි හානිකර ගැනීමක් ද එසේත් නැතිනම් යම් විෂ වර්ගයක් ශරීරගත වීමක් ද යන්න තහවුරු වනු ඇත.
මෙම මරණය දේශපාලන සහ නීතිමය ක්ෂේත්රයේ දැඩි අවධානයට ලක්ව ඇත්තේ කපිල චන්ද්රසේන මහතා සම්බන්ධයෙන් අධිකරණයෙන් වරෙන්තුවක් නිකුත් කර තිබූ පසුබිමක මෙය සිදුවීම හේතුවෙනි. 2013 එයාර්බස් ගනුදෙනුවේදී ඩොලර් මිලියන 2ක අල්ලසක් ලබා ගැනීමේ චෝදනාව මත ඔහු රක්ෂිත බන්ධනාගාරගතව සිටි අතර, මීට දින කිහිපයකට පෙර ඇප ලැබුණ ද එය ව්යාජ පුද්ගලයින් ඉදිරිපත් කර ලබාගත් බවට චෝදනා එල්ල විය. ඒ අනුව යළිත් වරෙන්තු නිකුත් කර තිබියදී සහ ඔහු අධිකරණය හමුවේ පෙනී සිටීමට නියමිතව තිබියදී මෙලෙස මියයාම විමර්ශන නිලධාරීන්ගේ දැඩි සැකයට භාජනය වී ඇත.
