ශ්රීලන්කන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ අබිරහස් මරණය සම්බන්ධයෙන් සිදුකරන විමර්ශනවලදී තීරණාත්මක තොරතුරු රැසක් අනාවරණය වී තිබේ. ඔහු සියදිවි හානි කරගැනීම සඳහා යොදාගත් පටිය, ඉකුත් 7 වැනිදා දහවල් බාන්ස් පෙදෙසේ පිහිටි සිය නිවසේ සිට කොල්ලුපිටියේ පිහිටි නිවස වෙත සේවකයකු ලවා ගෙන්වාගෙන ඇති බව පොලිසිය විසින් සොයාගෙන ඇත.
පොලිසිය විසින් ප්රශ්න කරන ලද අදාළ සේවකයා පවසා ඇත්තේ කපිල චන්ද්රසේන මහතා සිය ඇඳුම් කිහිපයක් සමඟ මෙම පටිය ද රැගෙන එන ලෙස තමන්ට උපදෙස් දුන් බවයි. චන්ද්රසේන මහතා ව්යායාම මධ්යස්ථාන (Gym) වෙත යන අවස්ථාවලදී මෙම පටිය නිතර භාවිත කරන බැවින් ඒ පිළිබඳව තමන්ට සැකයක් ඇති නොවූ බව ද සේවකයා ප්රකාශ කර තිබේ. කෙසේ වෙතත්, කොළඹ අපරාධ කොට්ඨාසය සැක කරන්නේ ඔහු කල්තියාම මෙම මරණය සැලසුම් කර තිබූ බවයි.
කපිල චන්ද්රසේන මහතාගේ සිරුර පසුගිය 8 වැනිදා කොල්ලුපිටියේ නිවසක තිබී සොයාගත් අතර, මරණයට හේතුව මෙතෙක් ස්ථිරව තහවුරු වී නොමැත. මරණ පරීක්ෂණය පැවැත්වූ වෛද්ය මණ්ඩලය විසින් සිරුරේ කොටස් විශේෂ රසායනාගාර පරීක්ෂණයක් සඳහා යොමු කර ඇති අතර එහි වාර්තාව ලැබුණු පසු මරණයට හේතුව නිශ්චිතව ප්රකාශ කළ හැකි වනු ඇත.
මේ අතර මෙම මරණය සම්බන්ධයෙන් හිටපු සුපිරි ක්රිකට් ක්රීඩක අරවින්ද ද සිල්වා මහතාගෙන්, ඔහුගේ බිරිඳගෙන් සහ නිවසේ සේවකයන්ගෙන් ද පොලිසිය ප්රකාශ සටහන් කරගෙන තිබේ. නිවස අවට CCTV දර්ශන පරීක්ෂා කිරීමේදී කිසිදු සැකකටයුතු පුද්ගලයෙකු නිවසට ඇතුළු වූ බවට සාක්ෂි හමු වී නොමැත. එයාර් බස් ගනුදෙනුවේදී ඩොලර් ලක්ෂ 20ක අල්ලස් ලබාගත් බවට චෝදනා ලැබ දින 54ක් රක්ෂිත බන්ධනාගාරගතව සිටි ඒ මහතා ඇප මත මුදාහැර තිබුණේ ඉකුත් 6 වැනිදාය.
