නාවලපිටිය පස්බාගේ කෝරළය ප්රාදේශීය සභා බල ප්රදේශයට අයත්, ස්වභාව සෞන්දර්යයෙන් අනූන “ගල්පොත්ත ඇල්ල” හෙවත් හයින්ෆෝඩ් ඇල්ල (සුදුගල ඇල්ල) වර්තමානයේ දැඩි ලෙස අපිරිසිදු වීමේ තර්ජනයකට මුහුණ පා තිබේ. නාවලපිටිය සමනලගම මාර්ගයෙන් ළඟාවිය හැකි මෙම ස්ථානය, ජලය මත ලිස්සා යෑම (Water Sliding) වැනි ස්වභාවික ජල ක්රීඩා සඳහා දෙස් විදෙස් සංචාරකයන් අතර බෙහෙවින් ප්රචලිතය.
කෙසේ වෙතත්, දෛනිකව සහ සති අන්ත නිවාඩු දිනවල මෙහි පැමිණෙන සංචාරකයන් විසින් ඉවතලන ප්ලාස්ටික්, නොදිරන අපද්රව්ය සහ මත්පැන් බෝතල් ඇතුළු විශාල කසළ ප්රමාණයක් පරිසරයට මුදා හැරීම හේතුවෙන් මෙම මනරම් ස්ථානය විනාශ වෙමින් පවතින බව ප්රදේශවාසීන් පෙන්වා දෙයි. වඩාත් බරපතළ කරුණ වන්නේ නාවලපිටිය නගරයට ජලය සපයන ජල පවිත්රාගාරය සඳහා ජල මූලාශ්රය ලෙස භාවිතා කරන්නේ ද මෙම දිය දහරාව වීමයි.
කසළ කළමනාකරණය හෝ පරිපාලන කටයුතු වෙනුවෙන් මෙතෙක් කිසිදු රාජ්ය ආයතනයක් නිසි මැදිහත් වීමක් කර නොමැති අතර, පැමිණෙන සංචාරකයන් සඳහා අවම සනීපාරක්ෂක පහසුකම් පවා මෙහි නොමැති බව වාර්තා වේ. මෙම වටිනා ජල මූලාශ්රය රැක ගැනීමටත්, සංචාරක කර්මාන්තය ප්රවර්ධනය කර රජයට ආදායම් ලබාගත හැකි ස්ථානයක් ලෙස මෙය දියුණු කිරීමටත් බලධාරීන් වහාම මැදිහත් විය යුතු බව ප්රදේශවාසීන් අවධාරණය කර සිටී.
