දිවයිනේ ප්රදේශ කිහිපයකට ඇද හැලෙන තද වැසි හේතුවෙන් බදුල්ල දිස්ත්රික්කයේ පස්සර ප්රාදේශීය ලේකම් කොට්ඨාසය සඳහා දෙවන මට්ටමේ (Level 2) නායයෑමේ පූර්ව අනතුරු ඇඟවීම් නිකුත් කිරීමට ජාතික ගොඩනැගිලි පර්යේෂණ සංවිධානය (NBRO) පියවර ගෙන ඇත. මෙම අනතුරු ඇඟවීම අද (11) පස්වරු 4:00 සිට හෙට (12) පස්වරු 4:00 දක්වා බලපැවැත්වේ.
මීට අමතරව පළමුවන මට්ටමේ (Level 1) හෙවත් ‘විමසිලිමත් වන්න’ යන පූර්ව අනතුරු ඇඟවීම් බදුල්ල දිස්ත්රික්කයේ බණ්ඩාරවෙල ප්රදේශයටත්, කළුතර දිස්ත්රික්කයේ වලල්ලාවිට ප්රදේශයටත්, කුරුණෑගල දිස්ත්රික්කයේ රිදීගම ප්රදේශයටත් නිකුත් කර තිබේ. එමෙන්ම මාතලේ දිස්ත්රික්කයේ රත්තොට, අඹන්ගඟ කෝරළය සහ නාවුල යන ප්රදේශවලටත්, මොනරාගල දිස්ත්රික්කයේ වැල්ලවාය සහ බඩල්කුඹුර ප්රදේශවලටත්, රත්නපුර දිස්ත්රික්කයේ රත්නපුර සහ කලවාන යන ප්රදේශවලටත් මෙම අනතුරු ඇඟවීම් අදාළ වේ.
පොළොවේ පිපිරුම් ඇතිවීම, ගස්, පවුරු හා විදුලි කණු ඇලවීම, ගොඩනැගිලිවල බිත්ති සහ පොළොව මතුපිට පැලුම් ඇතිවීම මෙන්ම හදිසියේ උල්පත් හටගැනීම වැනි නායයෑමේ පූර්ව ලක්ෂණ නිරීක්ෂණය වන්නේ නම්, වහාම එම ප්රදේශවලින් ඉවත් වීමට පියවර ගන්නා ලෙස බලධාරීන් ජනතාවගෙන් දැඩිව ඉල්ලා සිටී.
