විශ්වවිද්යාල අතුරු ව්යවස්ථාවලට වඩා තොරතුරු දැනගැනීමේ අයිතිවාසිකම පිළිබඳ පනත බලපැවැත්වෙන බව තීන්දු කරමින්, ඕනෑම විභාග අපේක්ෂකයෙකුට තමන් පිළිතුරු සැපයූ ඇගයීමට ලක්කළ ප්රශ්න පත්ර පරීක්ෂා කිරීමට අයිතියක් ඇති බව අභියාචනාධිකරණය ප්රකාශ කර තිබේ. උසස් අධ්යාපන ආයතන තුළ මෙවැනි තොරතුරු සැඟවීමේ ක්රියාවන් සිදු නොවිය යුතු බවත් විනිවිදභාවය අතිශය වැදගත් බවත් අවධාරණය කරමින් විනිසුරු ආචාර්ය සුමුදු ප්රේමචන්ද්ර සහ විනිසුරු ආර්. ගුරුසිංහ යන ද්විපුද්ගල විනිසුරු මඩුල්ල මෙම තීන්දුව ලබා දී ඇත.
මෙම නඩු තීන්දුව ප්රකාශයට පත් කරනු ලැබුවේ ශ්රී ලංකා විවෘත විශ්වවිද්යාලය විසින් 2023 වසරේ පවත්වන ලද එල්.එල්.බී. (LLB) ප්රවේශ පරීක්ෂණයකට අදාළව ශිෂ්යාවකගේ පියා විසින් ඉදිරිපත් කළ තොරතුරු ඉල්ලීමක් මුල් කරගනිමිනි. අදාළ ශිෂ්යාවගේ පිළිතුරු පත්ර සහ ලකුණු ලබා දී ඇති ආකාරය පරීක්ෂා කිරීමට විශ්වවිද්යාලය මුලින් අවසර ලබා නොදුන් අතර, විභාග ක්රියාවලියේ රහස්යභාවය සුරැකීම සඳහා තොරතුරු පනතේ වගන්ති යොදා ගනිමින් එම ඉල්ලීම ප්රතික්ෂේප කර තිබුණි. කෙසේ වෙතත් තොරතුරු දැනගැනීමේ අයිතිවාසිකම පිළිබඳ කොමිෂන් සභාව විසින් එම තොරතුරු ලබාදෙන ලෙස නියෝග කළ අතර විශ්වවිද්යාලය එම තීරණය අභියාචනාධිකරණය හමුවේ අභියෝගයට ලක් කළද අධිකරණය එය නිෂ්ප්රභ කර ඇත.
අධිකරණ තීන්දුවට අනුව, ඇගයීමට ලක්කළ ප්රශ්න පත්රය පරීක්ෂා කිරීමේදී එය ඇගයූ පරීක්ෂකවරයාගේ අනන්යතාවය හෙළි නොවන සේ කටයුතු කරමින් අපේක්ෂකයාට තමන්ගේ ප්රශ්න පත්රය නැරඹීමට පූර්ණ අයිතිය හිමිවේ. ආණ්ඩුක්රම ව්යවස්ථාවේ 14ඒ වගන්තිය සහ තොරතුරු දැනගැනීමේ පනතේ පූර්විකාව මගින් අපේක්ෂිත විනිවිදභාවය සුරැකීම උසස් අධ්යාපන ආයතනවල වගකීමක් බව මෙහිදී වැඩිදුරටත් අවධාරණය කෙරිණි.
