ඕස්ට්රේලියාවේ සිඩ්නි නුවර නිරිතදිග ප්රදේශයේ අද (12) පෙරවරුවේ වාහන 10ක් එකිනෙක ගැටීමෙන් සිදු වූ මහා පරිමාණ රිය අනතුරකින් එක් අයෙකු මියගොස් තවත් කිහිප දෙනෙකු තුවාල ලබා තිබේ. ලෙකෙම්බා (Lakemba) ප්රදේශයේ කැන්ටබරි පාරේදී (Canterbury Road) පෙ.ව. 11:40ට පමණ මෙම අනතුර සිදුව ඇති බව නිව් සවුත් වේල්ස් පොලිසිය තහවුරු කරයි.
මුලින්ම සෙඩාන් රථයක් සහ SUV රථයක් එකිනෙක ගැටී ඇති අතර එම ගැටීමේ ප්රබලතාවය නිසා SUV රථය ගුවනට එසවී එහි සිටි පිරිස සිරවී තිබේ. අනතුරුව සෙඩාන් රථය තවත් මීටර් කිහිපයක් ඉදිරියට ඇදී ගොස් ‘යුට්’ (Ute) වර්ගයේ රථයක මුහුණට මුහුණ ලා ගැටී ඇති අතර ඒ සමඟම තවත් වාහන හතක් එකිනෙක ගැටී මෙම මහා අනතුර සිදු වී ඇත. සෙඩාන් රථය පදවාගෙන ආ 80 හැවිරිදි වියේ පසුවන පුද්ගලයා එම ස්ථානයේදීම මියගොස් ඇති අතර එහි ගමන් කළ 78 හැවිරිදි කාන්තාව බරපතල තුවාල සහිතව ශාන්ත ජෝර්ජ් රෝහලට ඇතුළත් කර තිබේ. ඇයගේ තත්ත්වය මේ වන විටත් අසාධ්ය බව වාර්තා වේ.
සෙසු වාහනවල සිටි රියදුරන් සහ මගීන් නව දෙනෙකු සුළු තුවාල සහිතව බේරාගෙන ඇති අතර අනිවාර්ය පරීක්ෂණ සඳහා ඔවුන් ද රෝහල් ගත කිරීමට පියවර ගෙන තිබේ. අනතුර සිදු වූ ප්රදේශයේ අපරාධ ස්ථානයක් ලෙස නම් කර විශේෂ විමර්ශනයක් ආරම්භ කර ඇති අතර මේ පිළිබඳ තොරතුරු දන්නේ නම් වහාම දැනුම් දෙන ලෙස පොලිසිය මහජනතාවගෙන් ඉල්ලා සිටී.
