හවුල්කාරිත්වය සහ සහයෝගීතාවය තුළින් ගෝලීය වශයෙන් තරඟකාරී මෙන්ම සියලු දෙනාට ප්රතිලාභ ලැබෙන තිරසාර සංචාරක කර්මාන්තයක් ගොඩනැගිය හැකි බව අග්රාමාත්ය ආචාර්ය හරිනි අමරසූරිය පවසන්නීය. කොළඹ සිරිමාවෝ බණ්ඩාරනායක ප්රදර්ශන ශාලාවේදී අද (15) පෙරවරුවේ ආරම්භ වූ 13 වන ‘සංචාරක උදාව’ (Sancharaka Udawa) ප්රදර්ශනය විවෘත කරමින් අග්රාමාත්යවරිය මේ බව සඳහන් කළාය. ශ්රී ලංකා සංචාරක ප්රවර්ධන කාර්යාංශයේ සහයෝගයෙන් ශ්රී ලංකා අභ්යන්තර සංචාරක ක්රියාකරුවන්ගේ සංගමය විසින් සංවිධානය කරනු ලබන මෙම ප්රදර්ශනය මැයි 15 සහ 16 යන දෙදින පුරා කොළඹ BMICH හිදී පැවැත්වේ.
මෙවර ප්රදර්ශනය සඳහා ව්යවසායකයින් 250කට අධික පිරිසක් කුටි 300කින් සහභාගී වන අතර, ප්රථම වතාවට විදේශීය ගැනුම්කරුවන්ට (Foreign Hosted Buyers) ආරාධනා කිරීම විශේෂත්වයකි. එමගින් දේශීය සංචාරක ව්යවසායකයින්ට ජාත්යන්තර වෙළඳපොළ සමඟ සෘජුව ගනුදෙනු කිරීමට අවස්ථාව උදාවන අතර විදේශ නියෝජිතයින් 100කට අධික පිරිසකගේ සහභාගීත්වයෙන් ව්යාපාරික හමු (B2B) සහ වැඩමුළු රැසක් ද පැවැත්වීමට නියමිතය.
තිරසාර සහ පරිසර හිතකාමී සංචාරක ව්යාපාරයක් රජයේ දැක්ම බව අවධාරණය කළ අග්රාමාත්යවරිය, ක්ෂේත්රයේ මානව ප්රාග්ධනය ශක්තිමත් කිරීමේ වැදගත්කම ද පෙන්වා දුන්නාය. අධ්යාපන ප්රතිසංස්කරණ හරහා තරුණ ප්රජාවට සංචාරක ක්ෂේත්රයේ නව රැකියා අවස්ථා උදාකර දිය යුතු බවත්, ඒ සඳහා අධ්යාපන සහ සංචාරක අංශ අතර සමීප සහයෝගීතාවක් තිබිය යුතු බවත් ඇය ප්රකාශ කළාය. මෙම අවස්ථාවට සංචාරක නියෝජ්ය අමාත්ය මහාචාර්ය රුවන් රණසිංහ ඇතුළු රජයේ නිලධාරීන් සහ දේශීය විදේශීය නියෝජිතයන් රැසක් සහභාගී වූහ.
