පෞද්ගලික බැංකුවක පොදු ලෙජර් ගිණුම හරහා රුපියල් බිලියන 13ක මුදලක් වංචා කිරීමේ සිද්ධියට අදාළව, එම බැංකුවේ අධ්යක්ෂවරුන් ඇතුළු ඉහළ නිලධාරීන් සම්බන්ධ නම් ඔවුන් කඩිනමින් විමර්ශනය කර අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්රධාන මහේස්ත්රාත් අසංග එස්. බෝදරගම මහතා ඊයේ (14) නියෝග කළේය.
මෙම වංචාව සම්බන්ධයෙන් බැංකුවේ අධ්යක්ෂවරුන් පිළිබඳව ද විමර්ශනය කර අධිකරණයට ඉදිරිපත් කිරීමට අපරාධ පරීක්ෂණ දෙපාර්තමේන්තුව (CID) අපේක්ෂා කරන බව දැනුම් දුන් අතර, ඒ අනුව මහේස්ත්රාත්වරයා මෙම නියෝගය නිකුත් කරන ලදී. 2024 සිට 2026 දක්වා කාලය තුළ සිදුකරන ලද අභ්යන්තර විගණන වාර්තා, බැංකු දත්ත පද්ධතියට හානියක් නොවන පරිදි කඩිනමින් අපරාධ පරීක්ෂණ දෙපාර්තමේන්තුවට ලබා දෙන ලෙස බැංකුවට නියෝග කෙරිණි.
විමර්ශන කටයුතු සඳහා බැංකුවේ තිබූ ලැප්ටොප් පරිගණක දෙකක් සහ ඩෙස්ක්ටොප් පරිගණක තුනක් මේ වන විට පරීක්ෂාවට ලක් කරමින් පවතින බව අපරාධ පරීක්ෂණ දෙපාර්තමේන්තුවේ අන්තර්ජාල ආවේක්ෂණ අංශයේ නිලධාරීන් අධිකරණයට දැන්වීය. තවත් පුද්ගලයින් පිරිසකගෙන් ප්රකාශ සටහන් කර ගැනීමෙන් අනතුරුව, වැඩිදුරටත් පරිගණක උපකරණ අත්අඩංගුවට ගන්නේද යන්න පිළිබඳව අධිකරණයට කරුණු දක්වන බව ද ඔවුහු සඳහන් කළහ.
බැංකුව වෙනුවෙන් පෙනී සිටි නීතිඥවරුන් ප්රකාශ කළේ බැංකුවේ මුල් දත්ත පද්ධතියට හානියක් නොවන ලෙස අවශ්ය විගණන කටයුතු සිදු කිරීමට පියවර ගෙන ඇති බවත්, විමර්ශන සඳහා පූර්ණ සහයෝගය ලබා දෙන බවත්ය.
