තරුණ වෛද්යවරුන් ඇතුළු ප්රමුඛ පෙළේ වෛද්යවරුන් මෙරට සේවය කිරීම වෙනුවට නැවතත් විශාල වශයෙන් විදේශගත වීමේ ප්රවණතාවක් මතුව ඇති බවත්, මේ හේතුවෙන් දිවයින පුරා පිහිටි ප්රධාන මෙන්ම ග්රාමීය රෝහල්වල සෞඛ්ය සේවා පවත්වාගෙන යාම දැඩි අර්බුදයකට ලක්ව ඇති බවත් ජාතික වෘත්තීය හා සිවිල් පෙරමුණේ සභාපති, විශේෂඥ වෛද්ය චමල් සංජීව මහතා සඳහන් කරයි.
ඔහු පෙන්වා දෙන්නේ වසර ගණනාවක් මෙරට සෞඛ්ය පද්ධතිය තුළ සේවය කළ නිර්වින්දන වෛද්යවරුන් (Anaesthetists) සහ ශල්ය වෛද්යවරුන් (Surgeons) ඇතුළු පිරිස් මෙන්ම තරුණ වෛද්යවරුන් ද විදේශීය වෛද්ය විභාග සමත් වෙමින් ශ්රී ලංකාව හැර යමින් සිටින බවයි. මෙම දැඩි වෛද්ය හිඟය හේතුවෙන් මේ වන විට රෝහල්වල ඉතිරිව සිටින වෛද්යවරුන්ට තම සාමාන්ය රාජකාරි සීමාව ඉක්මවා යමින් අතිවිශාල වැඩකොටසක් සහ අමතර සේවා මුරයන් ඉටු කිරීමට සිදුව ඇතැයි ද ඔහු සඳහන් කළේය.
මීට අමතරව, පසුගිය ආර්ථික අර්බුද සමයේ රට හැරගිය වෛද්යවරුන් සහ විශේෂඥ වෛද්යවරුන් පිරිසක් නැවත මෙරටට පැමිණ සේවය කිරීමට සූදානමින් සිටින බව ද වෛද්ය චමල් සංජීව මහතා හෙළිදරව් කරයි. කෙසේ වෙතත්, රාජ්ය සේවා කොමිෂන් සභාව සහ සෞඛ්ය අමාත්යාංශය විසින් ඔවුන්ට නැවත සේවයට ඇතුළත් වීමට අවශ්ය නව පත්වීම් ලබාදීම ප්රායෝගිකව ප්රමාද කිරීම හෝ ප්රතික්ෂේප කිරීම හේතුවෙන්, ලංකාවට පැමිණීමට සිටි වෛද්යවරුන් ද සිය තීරණය වෙනස් කර විදේශයන්හිම රැඳී සිටීමට තීරණය කර ඇති බව ඔහු වැඩිදුරටත් අවධාරණය කළේය.
