පොල්ගහවෙල සිට දකුණු කළුතර බලා ධාවනය වූ මන්දගාමී දුම්රිය ඉකුත් 16 වැනිදා අලුයම 5.20ට පමණ වනවාසල දුම්රිය ස්ථානය ආසන්නයේදී පීලි පැනීමට ලක්වීමේ සිද්ධියට හේතුව මත්කුඩු ලෝලියෙකු විසින් දුම්රිය මාර්ගයේ පීලි මාරු කරන කොටසේ තිබූ යකඩ ලීවර් ගලවා සොරකම් කිරීම බව විමර්ශනවලින් අනාවරණය වී ඇත. සැකකරු සහ සොරකම් කරන ලද යකඩ මිලදී ගත් පුද්ගලයා ඊයේ (17) කොළඹ මහේස්ත්රාත් අධිකරණයට ඉදිරිපත් කිරීමෙන් පසු ලබන 29 වැනිදා දක්වා රක්ෂිත බන්ධනාගාරගත කර තිබේ.
පෑලියගොඩ පොලිසිය මඟින් අත්අඩංගුවට ගත් සැකකරු වනවාසල, ජම්බුවත්ත ප්රදේශයේ පදිංචි 27 හැවිරිදි තරුණයෙකි. ඔහු විසින් අලුයම් කාලයේදී ගලවන ලද යකඩ ලීවර් දෙක වත්තල පිහිටි පරණ යකඩ බඩු ගන්නා ස්ථානයකට රුපියල් 2,400කට වැනි සුළු මුදලකට අලෙවි කර, එම මුදලින් මත්කුඩු මිලදී ගෙන තිබූ බව පොලිසිය පවසයි. ලීවර් ගලවා තිබීම හේතුවෙන් දුම්රිය ධාවනයේදී ඇති වූ දෙදිරීමත් සමඟ පීලි මාරුවක් සිදුව ඇති අතර, ඒ හේතුවෙන් දුම්රිය එන්ජිම ප්රධාන මාර්ගයේත් පසුපස මැදිරි අරුවක්කාලු කසළ ව්යාපෘතිය සඳහා ඉදිකර ඇති අනු මාර්ගයටත් ඇදී යාමෙන් මෙම අනතුර සිදුව ඇත. අනතුර සිදුවන අවස්ථාවේදී දුම්රිය වනවාසල ස්ථානයෙන් ගමන් ආරම්භ කළා පමණක් බැවින් එහි වේගය පැයට කිලෝමීටර් 10-15ත් අතර පැවතීම නිසා ජීවිත හානි කිසිවක් සිදු නොවීය.
කෙසේ වෙතත්, මෙම අනතුර සිදුවීමට පැයකට පමණ පෙර පැයට කිලෝමීටර් 60-70ක වේගයෙන් ධාවනය වූ ත්රිකුණාමලය – කොළඹ සහ කන්කසන්තුරේ – මොරටුව ශීඝ්රගාමී දුම්රිය දෙකක් ද මෙම ස්ථානය පසුකර ගොස් ඇත්තේ ලීවර් ගලවා තිබූ පසුබිමකය. එම ශීඝ්රගාමී දුම්රියක් අනතුරට ලක්වූයේ නම් ලංකා ඉතිහාසයේ බිහිසුණුම දුම්රිය අනතුරක් ලෙස සැලකෙන ‘යත්තල්ගොඩ’ අනතුර වැනි මහා විපතක් සිදුවීමට ඉඩ තිබූ බව විමර්ශන නිලධාරීහු පෙන්වා දෙති. මෙම අනතුර හේතුවෙන් දුම්රිය සංඥා පද්ධතියට පමණක් රුපියල් ලක්ෂ 20ක (මිලියන 2ක) අතිවිශාල අලාභයක් සිදුව ඇතැයි දුම්රිය දෙපාර්තමේන්තුව සඳහන් කරයි.
