NDB බැංකුවේ සිදුවූ රුපියල් බිලියන දහතුනකට අධික දැවැන්ත මූල්ය වංචාවට අදාළ මුදල් ක්රිප්ටෝ මුදල් (Cryptocurrency) හරහා ආයෝජනය කර ඇති බවට පැතිර යන වාර්තා සම්බන්ධයෙන් මහ බැංකු අධිපති ආචාර්ය නන්දලාල් වීරසිංහ මහතා විශේෂ පැහැදිලි කිරීමක් කළේය. ඊයේ (18) පැවති මාධ්ය හමුවකදී අදහස් දක්වමින් ඔහු කියා සිටියේ, එවැනි ආයෝජනයක් පිළිබඳව මෙතෙක් නිශ්චිත තොරතුරු අනාවරණය වී නොමැති බවයි.
මුදල් වංචා කරන පුද්ගලයන් සොයාගත නොහැකි වන සේ මුදල් සැඟවීමට ක්රිප්ටෝ මුදල් භාවිත කිරීමේ ප්රවණතාවක් පවතින බව පිළිගත් අධිපතිවරයා, එලෙස මුදල් හුවමාරු වී ඇත්දැයි සෙවීම පොලිස් විමර්ශනවලට සහ ඉදිරියේදී පැවැත්වීමට නියමිත වෝහාරික විගණනයට (Forensic Audit) අදාළ කාරණයක් බව පෙන්වා දුන්නේය. මහ බැංකුවේ මැදිහත්වීම පවතින්නේ බැංකු පද්ධතිය තුළ සිදුවූ දෝෂය හඳුනාගෙන එය නිවැරදි කිරීමට මිස, බැංකුවෙන් පිටතට ගිය මුදල් ලුහුබැඳීම නීතිය ක්රියාත්මක කරන ආයතන සතු වගකීමක් බව ද ඔහු වැඩිදුරටත් අවධාරණය කළේය.
