ශ්රී ලංකාව සහ ඉන්දියාව අතර ද්විපාර්ශ්වික ආර්ථික සබඳතා තවදුරටත් ශක්තිමත් කරමින්, දෙරටේ ඉහළ පෙළේ රාජ්ය නිලධාරීන් සහ ප්රමුඛ පෙළේ ව්යාපාරික නායකයින්ගේ සහභාගිත්වයෙන් “ඉන්දු – ශ්රී ලංකා ව්යාපාරික සමුළුව සහ ප්රධාන විධායක නිලධාරීන්ගේ හමුව” (India–Sri Lanka Business Forum and CEOs Interaction) මෑතකදී ඉන්දියාවේ මුම්බායි නුවරදී සාර්ථකව පවත්වා තිබේ. ලංකා වාණිජ මණ්ඩලය (Ceylon Chamber of Commerce) සහ ඉන්දීය කර්මාන්ත සම්මේලනය (CII) ඒකාබද්ධව සංවිධානය කළ මෙම සමුළුවේදී දෙරට අතර වෙළෙඳ, ආයෝජන සහ කලාපීය සන්නිවේදන සබඳතා පුළුල් කිරීම කෙරෙහි දැඩි අවධානයක් යොමු විය.
මෙම සමුළුව අමතමින් ඉන්දියාවේ ශ්රී ලංකා මහකොමසාරිස් මහීෂිණී කොලන්න පෙන්වා දුන්නේ මෙම සහයෝගීතාව හුදෙක් වෙළෙඳ පරිමාවන් ඉහළ නැංවීමක් පමණක් නොව, දිගුකාලීන හවුල්කාරිත්වයන්, ඒකාබද්ධ ව්යාපාර සහ කලාපීය අගය එකතු කිරීමේ දාමයන් (Regional Value Chains) ගොඩනැඟීමක් බවයි. ශ්රී ලංකා ජනාධිපතිවරයාගේ ජ්යෙෂ්ඨ ආර්ථික උපදේශක දුමින්ද හුලංගමුව මෙහිදී අවධාරණය කළේ, ශ්රී ලංකාව මේ වන විට ආර්ථික ස්ථාවරත්වයේ සිට තිරසාර වර්ධන මාවතක් වෙත පිවිස ඇති බැවින් ප්රවාහන, සැපයුම්, ඩිජිටල් සේවා සහ ඉහළ වටිනාකමකින් යුතු නිෂ්පාදන ක්ෂේත්ර සඳහා ආයෝජනය කරන ලෙස ඉන්දීය ව්යවසායකයින්ට ආරාධනා කරන බවයි.
ලංකා වාණිජ මණ්ඩලයේ සභාපති ක්රිෂාන් බාලේන්ද්ර සහ ඉන්දීය කර්මාන්ත සම්මේලනයේ බටහිර කලාපීය නියෝජිත අනුරාග් අගර්වාල් ඇතුළු පිරිස මෙහිදී ප්රකාශ කළේ, දෙරට අතර මුහුදු සහ ගුවන් ගමන් සබඳතා දියුණු වීම මෙන්ම ඩිජිටල් ගෙවීම් පද්ධති ඒකාබද්ධ වීම (Digital Payment Integration) හරහා ව්යාපාර කටයුතු පහසුවෙන් සිදුකිරීමේ හැකියාව තවදුරටත් වර්ධනය වී ඇති බවයි. පුනර්ජනනීය බලශක්තිය, තොරතුරු තාක්ෂණය, සංචාරක ව්යාපාරය, යටිතල පහසුකම් සහ සෞඛ්ය යන අනාගතයට ගැළපෙන ක්ෂේත්ර රැසක් ඔස්සේ පෞද්ගලික අංශයේ සබඳතා තවදුරටත් පුළුල් කිරීමට සහ නව ආයෝජන අවස්ථා උදාකර ගැනීමට මෙම සමුළුව හරහා මඟ පෑදී තිබේ.
