පසුගිය කාලයේ රට පුරා දැඩි ආන්දෝලනයකට තුඩු දුන් කුරුණෑගල ඉපැරණි රාජසභා මණ්ඩපය මේ වන විට කිසිදු වගකිවයුතු ආයතනයක අවධානයකින් තොරව බරපතළ විනාශයකට ලක්වෙමින් පවතී. අදාළ ස්ථානය ආසන්නයේ වෙසෙන ජනතාව පෙන්වා දෙන්නේ, රාත්රී කාලයේදී මෙම ස්ථානය මත්පැන් පානය කරන්නන්ගේ සහ ගණිකා සේවයේ යෙදෙන්නන්ගේ තිප්පොළක් බවට පත්ව ඇති බවයි.
කුරුණෑගල රාජධානි සමයට අයත් බව පැවසෙන මෙම ස්ථානය කඩා බිඳ දැමීම සම්බන්ධයෙන් හිටපු නගරාධිපතිවරයෙකු ඇතුළු පිරිසකට නීතිමය ක්රියාමාර්ග ගෙන සිර දඬුවම් සහ රුපියල් කෝටියකට අධික වන්දි මුදලක් අය කර ගැනීමට අධිකරණය නියෝග කර තිබිණි. එම සිදුවීමෙන් පසු පුරාවිද්යා දෙපාර්තමේන්තුව භාරයට ගත් මෙම භූමිය සංරක්ෂණය කරන බවට බලධාරීන් පොරොන්දු වුවද, එය හුදු ප්රකාශයකට පමණක් සීමා වී ඇත.
ప్రస్తుත තත්ත්වය පිළිබඳව ජනතාව සිදු කරන චෝදනා අනුව, ආරක්ෂාවේ දුර්වලතා පවතින බවත්, ස්ථානය අවට කටු කම්බි ගසා ආවරණය කර ඇතත් පිවිසුම් දොරටුව සඳහා අගුලක් හෝ යොදා නොමැති බවත් පවසති. ගේට්ටුව ලණු කැබැල්ලකින් ගැටගසා තිබීම හේතුවෙන් ඕනෑම අයෙකුට පහසුවෙන් ඇතුළු විය හැකි තත්ත්වයක් පවතී. වටිනා දැව විනාශය සම්බන්ධයෙන් ද ජනතාව පවසන්නේ එම ස්ථානයේ තිබූ ඉපැරණි දැව කඳන් රැසක් කිසිදු රැකවරණයක් නොමැතිව එළිමහනේ දිරා යමින් පවතින බවයි. මීට අමතරව, පරිසර දූෂණය සිදුවන බවත්, ආසන්නයේ පිහිටි දුර ගමන් බස් රථ නැවතුම්පොළේ සිටින පිරිස් විසින් ඉවත දමන ප්ලාස්ටික් බෝතල්, වීදුරු මත්පැන් බෝතල් සහ අනෙකුත් අපද්රව්ය මෙම ඓතිහාසික භූමිය තුළ ගොඩගැසී පවතින බවත් ජනතාව සඳහන් කරති.
මෙම ස්ථානය සංචාරක ආකර්ෂණයක් ලෙස සංවර්ධනය කිරීමට සහ ජනතාවට ගිමන් නිවාගත හැකි ස්ථානයක් බවට පත් කිරීමට විශාල අවස්ථාවක් තිබියදීත්, බලධාරීන්ගේ දැඩි නොසැලකිල්ල හමුවේ එය අහිමිව යමින් පවතී. විශේෂයෙන්ම, වන්දි වශයෙන් අය කරගත් රුපියල් කෝටියකට අධික මුදලින් හෝ මෙම ස්ථානය නැවත ප්රතිසංස්කරණය කිරීමට පියවර නොගැනීම පිළිබඳව කුරුණෑගල ප්රදේශවාසීහු දැඩි කළකිරීමකින් පසුවෙති. එම මුදලින් සිදුවූයේ කුමක්ද යන්න පිළිබඳව විමර්ශනයක් අවශ්ය බව ද ඔවුහු අවධාරණය කරති.
