කඳුකර වතු ජනතාවගේ ඉඩම් අයිතිය තහවුරු කරන ලෙස ඉල්ලමින් තලවාකැලේ නගරයේ සිට කොළඹ ජනාධිපති ලේකම් කාර්යාලය සහ එක්සත් ජාතීන්ගේ මානව හිමිකම් කාර්යාලය (UNHRC) වෙත සංදේශයක් භාරදීම සඳහා කිලෝමීටර් 140ක දුර පා ගමනක යෙදීමට සැරසුණු 7 හැවිරිදි පාසල් සිසුවෙකුගේ පාගමන හැටන් නගරයේදී නතර කිරීමට පොලිසිය පියවර ගෙන තිබේ. හැටන් කොට්ඨාස භාර ජ්යෙෂ්ඨ පොලිස් අධිකාරී ප්රදීප් වීරසේකර මහතාගේ උපදෙස් මත ඊයේ (20) දින පස්වරුවේ මෙම පියවර ගෙන ඇත.
පෙරටුගාමී සමාජවාදී පෙරමුණ (FSP) සහ රාජ්ය නොවන සංවිධාන (NGOs) කිහිපයක් එක්ව මෙම පාසල් සිසුවා සහ ඔහුගේ දෙමව්පියන් සම්බන්ධ කරගනිමින් ඊයේ උදෑසන තලවාකැලේ නගරයෙන් මෙම පාගමන සංවිධානය කර තිබුණි. මෙලෙස පාගමනේ යෙදී ඇත්තේ තලවාකැලේ ලිඳුල නාගසේන සරස්වතී දෙමළ විද්යාලයේ ඉගෙනුම ලබන, ලිඳුල ඉල්ඩන්හොල් වත්තේ (අංක 06 ලයිම) පදිංචි ප්රේමරාජා කාර්ගි නැමැති 7 හැවිරිදි දරුවෙකි. ඔහු තලවාකැලේ සහ කොටගල නගර පසුකරමින් කිලෝමීටර් 21ක දුරක් ගෙවා හැටන් මල්ලිඅප්පු මංසන්ධියට පැමිණි අවස්ථාවේදී හැටන් කොට්ඨාස කාන්තා කාර්යාංශයේ ප්රධාන පොලිස් පරීක්ෂක කුමාරි විජේසිංහ මහත්මිය සහ හැටන් පරිවාස කාර්යාලයේ නිලධාරිනියන් විසින් මෙම පාගමන වටලනු ලැබීය.
එහිදී පොලිසිය සහ පරිවාස නිලධාරීන් විසින් දෙමව්පියන්ට සහ සංවිධායකයින්ට පෙන්වා දී ඇත්තේ බාලවයස්කාර කුඩා දරුවෙකු මෙවැනි වෙහෙසකර දේශපාලනික පාගමනකට යොදාගැනීම ළමා අයිතිවාසිකම් උල්ලංඝනය කිරීමක් මෙන්ම දණ්ඩ නීති සංග්රහය යටතේ වරදක් බවයි. ඒ අනුව පාගමන වහාම නතර කළ පොලිසිය, පරිවාස නිලධාරීන් හරහා දරුවාව සුරක්ෂිතව දෙමව්පියන්ට භාර දීමට කටයුතු කර තිබේ. මෙම සිද්ධිය සම්බන්ධයෙන් දරුවා ලවා පාරවල් ගස්සවමින් අනිසි ලෙස යොදාගත් සංවිධායකයින් සියලු දෙනාගෙන් ප්රකාශ සටහන් කරගෙන හැටන් මහේස්ත්රාත් අධිකරණය වෙත කරුණු වාර්තා කිරීමට කටයුතු කරන බව ජ්යෙෂ්ඨ පොලිස් අධිකාරී ප්රදීප් වීරසේකර මහතා වැඩිදුරටත් සඳහන් කළේය.
