මෝටර් රථ ආනයනය වෙනුවෙන් පනවන ලද තාවකාලික අධිභාරය (Temporary Surcharge) පිළිබඳ ගැසට් නිවේදනය නිකුත් වීමට ආසන්න දිනකදී ජෝන් කීල්ස් CG ඔටෝ (JKCG Auto) සමාගම ඇතුළු ආනයනකරුවන් පිරිසක් ණයවර ලිපි (Letters of Credit) විවෘත කර ඇති බවට සමාජය තුළ පැතිර යන චෝදනා එකහෙළා ප්රතික්ෂේප කරන බව එම සමාගම නිල නිවේදනයක් නිකුත් කරමින් සඳහන් කරයි. 2026 මැයි මස 15 වන දිනැති අංක 2488/56 දරන විශේෂ ගැසට් නිවේදනය මගින් මෙම අධිභාරය හඳුන්වා දුන් අතර, ඊට පෙර දිනකදී සමාගම විසින් BYD රථවාහන වෙනුවෙන් කිසිදු ණයවර ලිපියක් විවෘත කර නොමැති බවත්, එවැනි බදු සංශෝධනයක් පිළිබඳව සමාගමට කිසිදු පූර්ව දැනුමක් හෝ තොරතුරක් නොතිබූ බවත් ඔවුන් තරයේ කියා සිටියි. මෙරට මෝටර් රථ වෙළඳපොළේ ප්රධාන පෙළේ ආයතනයක් ලෙස සාමාන්ය ව්යාපාරික ක්රියාවලිය යටතේ නිරන්තරයෙන් ඇණවුම් ලබාදීම සිදුකරන බව පෙන්වා දෙන JKCG සමාගම, BYD රථවාහන වෙනුවෙන් ඔවුන් සිදුකළ නවතම ඇණවුම් සියල්ලම 2026 මාර්තු මාසයේ සිට අප්රේල් මස 30 වනදා දක්වා වූ කාලසීමාවට පමණක් අයත් වන බව අනාවරණය කරයි. අප්රේල් 30 වනදායින් පසුව, එනම් එළඹුණු මැයි මාසයේ කිසිදු අවස්ථාවක මෙම වාහන ආනයනය වෙනුවෙන් නව ණයවර ලිපි (LC) විවෘත කර නොමැති බව ද සමාගම වෘත්තීය මට්ටමින් සහතික කර සිටියි. රට තුළ පවතින නීතිමය සහ නියාමන රාමුවට පූර්ණ වශයෙන් අනුකූල වෙමින්, ඉහළ විනිවිදභාවයකින් සහ යහපාලන ප්රතිපත්තිවලට ගරු කරමින් තම ව්යාපාරික කටයුතු ඉදිරියටත් සිදුකරන බව JKCG සමාගම පවසයි. පාරිභෝගික ජනතාව වෙනුවෙන් උපරිම වගකීමෙන් යුතුව සේවා සැපයීමට සමාගම නිරන්තරයෙන් බැඳී සිටින බව ද ජෝන් කීල්ස් සමූහ ව්යාපාරයට (John Keells Group) අයත් මෙම සමාගම නිකුත් කළ නිල නිවේදනයේ වැඩිදුරටත් සඳහන් වේ.
