පොලු මුගුරුවලින් පහරදී පුද්ගලයකු ඝාතනය කිරීමේ වරදට එකම පවුලේ පියා සහ පුතුන් ඇතුළු පුද්ගලයන් පස්දෙනෙකුට වසර දහනමයක (19) දීර්ඝ නඩු විභාගයකින් අනතුරුව මරණ දඬුවම නියම කිරීමට බලපිටිය මහාධිකරණ විනිසුරු රුචිර වැලිවත්ත මහතා අද (22) නියෝග කළේය.
මෙසේ මරණ දඬුවම නියම වූයේ බටපොළ, බටදූව ප්රදේශයේ පදිංචි කුලප්පුවාවඩු වසන්ත ජයලත්, කුලප්පුවාවඩු පර්ල් බන්දුල, කුලප්පුවාවඩු නන්දන පද්මකීර්ති (එකම පවුලේ පියා, පුතුන් සහ ඥාතීන්) මෙන්ම සන්දාමරක්කල ජනක කුමාර සහ හිනිදුමගේ ලහිරු මධුරංග නැමැති විත්තිකරුවන් පස්දෙනාටය.
ඝාතනය සහ නඩු විභාගය:
මෙම විත්තිකරුවන් අතින් ඝාතනයට ලක්ව තිබුණේ බටපොළ, බටදූව ප්රදේශයේම පදිංචිව සිටි ගුස්තිඥ්ඥාවඩු මංජුල නැමැති අයෙකි. පසුගිය 2007 ජූලි මස 29 වැනිදා හෝ ඊට ආසන්න දිනයකදී පවුල් ආරවුලක් දුරදිග යාමෙන් මෙම පිරිස විසින් පොලු මුගුරුවලින් පහරදී මෙම ඝාතනය සිදුකර තිබුණි. වසර 19ක් පුරා විභාග වූ මෙම නඩුවේදී විත්තිකරුවන් පස්දෙනා විසින්ම මෙම ඝාතනය සිදුකළ බව සාධාරණ සැකයකින් තොරව ඔප්පු වී ඇති බව විනිසුරුවරයා ප්රකාශ කළේය.
මෙම නඩුව වෙනුවෙන් රජයේ අධිනීතීඥ හිරුණි ගුණතිලක මහත්මිය පැමිණිල්ල මෙහෙයවූ අතර මීටියාගොඩ පොලීසියේ පොලිස් කොස්තාපල් අරුණජිත් මහතා (97474) විමර්ශන සඳහා සහයෝගය දක්වා තිබුණි.
