සෙස් (CESST) බද්ද සම්පූර්ණයෙන්ම ඉවත් කිරීමට රජය තීරණය කර ඇති හෙයින්, ඉන් පසු බදු එකතු කර ගැනීම සඳහා රජය සතු නව වැඩපිළිවෙළ කුමක්දැයි විපක්ෂ නායක සජිත් ප්රේමදාස මහතා පාර්ලිමේන්තුවේදී අද (22) ප්රශ්න කළේය. පාර්ලිමේන්තු ස්ථාවර නියෝග 27 (2) යටතේ විශේෂ ප්රකාශයක් කරමින් විපක්ෂ නායකවරයා මේ බව කියා සිටියේය.
එහිදී විපක්ෂ නායකවරයා මතු කළ ප්රධාන කරුණු මෙසේය:
වත්මන් රජයේ ආර්ථික ප්රතිපත්ති හේතුවෙන් ශ්රී ලංකාව දේශීය නිෂ්පාදන ආර්ථිකයකින් නැවතත් ආනයන ආර්ථිකයක් දෙසට ගමන් කරමින් සිටින බව ඔහු පෙන්වා දුන්නේය. ජාත්යන්තර මූල්ය අරමුදල (IMF) සමඟ ඇති කරගත් එකඟතා අනුව 2029 වන විට සෙස් (Cess) බද්ද සහ පැල් (PAL – Ports and Airport Development Levy) බද්ද සම්පූර්ණයෙන්ම ඉවත් කිරීමට රජය පොරොන්දු වී ඇතත්, එමඟින් රටේ වෙළඳ සමතුලිතතාවයට (Trade Balance) සිදුවිය හැකි බරපතළ බලපෑම පිළිබඳව ගැටලු රාශියක් මතු වන බව ද ඔහු අවධාරණය කළේය.
මෙම බදු ඉවත් කිරීම හරහා දේශීය කර්මාන්තකරුවන්ට සහ රජයේ ආදායමට සිදුවන පාඩුව පියවා ගැනීමට රජය සතු විකල්ප ප්රතිපත්තිය කුමක්ද යන්න පිළිබඳව වහාම රටට පැහැදිලි කිරීමක් අවශ්ය බව ද සජිත් ප්රේමදාස මහතා වැඩිදුරටත් ඉල්ලා සිටියේය.
