මහා විහාර වංශික ස්යාමෝපාලි මහා නිකායේ ශ්රී රෝහණ මහා සංඝ සභාවේ ශ්රීමත් මහා නායක, ඓතිහාසික සිත්තම්ගල්ලෙන රාජමහා විහාරාධිපති, විශ්රාමලත් විදුහල්පති අතිපූජ්ය අගලබඩ පියසිරි අභිධාන මහා නායක ස්වාමීන්ද්රයන් වහන්සේගේ අපවත්වීම සම්බුද්ධ ශාසනයට සහ සමාජයට සිදු වූ විශාල පාඩුවකි.
රම්මලේ කන්ද වනගහනයේ පිහිටි ඓතිහාසික සිත්තම්ගල්ලෙන රාජමහා විහාරය, අද පවතින අභිමානවත් තත්ත්වයට පත් වූයේ උන්වහන්සේගේ විහාරාධිපති පදවි ප්රාප්තියෙන් පසු සිදුකළ දැවැන්ත සංවර්ධන ක්රියාවලිය හේතුවෙනි. එසේම දක්ෂ ගුරුවරයෙකු සහ විදුහල්පතිවරයෙකු වූ උන්වහන්සේ, ශාසනය වෙනුවෙන් පිළිවෙත් ගරුක දක්ෂ ශිෂ්ය පිරිසක් දායාද කිරීමට කටයුතු කළහ.
ශ්රී රෝහණ මහා සංඝ සභාවේ දියුණුව උදෙසා වසර 30කට අධික කාලයක් විධායක කාරක සභිකයෙකු ලෙස සහ කර්මාචාර්යවරයෙකු ලෙස උන්වහන්සේ කළ සේවය විශිෂ්ටය. 2022 මාර්තු මස 27 වන දින සිට ශ්රී රෝහණ මහා සංඝ සභාවේ 5 වන මහා නායක ධුරය හොබවමින් උන්වහන්සේ ලබාදුන් නායකත්වය සංඝ සභාවේ අභිවෘද්ධියට මහත් පිටුවහලක් විය. නිහතමානී බව, උගත්කම, ඉවසීම සහ තනතුරු කෙරෙහි ලොල් නොවූ පරිත්යාගශීලී ගුණය උන්වහන්සේගේ ජීවිතයේ කැපී පෙනෙන ලක්ෂණ විය.
අපවත් වූ මහා නාහිමිපාණන් වහන්සේගේ ශ්රී දේහය පිළිබඳ ආදාහන පූජෝත්සවය හෙට (24) ඉරිදා සවස 3.00ට සිත්තම්ගල්ලෙන රාජමහා විහාරස්ථ ආදාහන මළුවේදී සිදු කිරීමට නියමිතය. උන්වහන්සේට උතුම් නිවන් සුව ප්රාර්ථනා කරමු.
