පසුගිය පැය 24ක කාලය තුළ රුසියාවේ සහ යුක්රේනයේ එල්ල වූ මිසයිල සහ ඩ්රෝන ප්රහාරවලින් පුද්ගලයන් අවම වශයෙන් අට දෙනෙකු ජීවිතක්ෂයට පත්ව ඇති බව දෙපාර්ශ්වයේම බලධාරීන් තහවුරු කරයි.මෙම ප්රහාරවලින් රුසියාවේ බෙල්ගොරොඩ් කලාපයේ බලශක්ති යටිතල පහසුකම්වලට හානි සිදුව ඇති අතර, එම ප්රදේශයේ ජල සහ විදුලි සැපයුම ද ඇණහිට තිබේ.
රුසියාවේ පාලනය යටතේ පවතින නැගෙනහිර යුක්රේනයේ හොර්ලිව්කා (Horlivka) නගරයේදී යොවුන් වියේ පසුවන දෙදෙනෙකු ඇතුළු සිව්දෙනෙකු යුක්රේන ප්රහාරවලින් ජීවිතක්ෂයට පත්ව ඇතැයි එම නගරයේ නගරාධිපතිවරයා පවසයි.රුසියාවේ බෙල්ගොරොඩ් කලාපයේදී එල්ල වූ ප්රහාරයකින් පුද්ගලයෙකු මියගොස් තවත් අයෙකු තුවාල ලබා ඇත.
මෙම ප්රහාර මාලාව ආරම්භ වූයේ රුසියාවේ පාලනය යටතේ පවතින ලුහාන්ස්ක් ප්රදේශයේ ශිෂ්ය නේවාසිකාගාරයකට ඩ්රෝන ප්රහාරයක් එල්ල වූ බවට රුසියාව කළ චෝදනාවකින් පසුව, මොස්කව් රජය පළිගැනීමේ ප්රහාර එල්ල කරන බවට පොරොන්දු වීමත් සමඟය. කෙසේ වෙතත්, යුක්රේන හමුදාව මෙම චෝදනා ප්රතික්ෂේප කරමින් පවසන්නේ තමන් එල්ල කළේ එරට විශේෂ ඩ්රෝන විධාන ඒකකයකට පමණක් බවයි.වසර හතරක් පුරා ඇදී යන මෙම යුද්ධය අවසන් කිරීමට අමෙරිකානු මැදිහත්වීම මේ වන විට අසාර්ථක වී ඇති අතර, යුක්රේනය සිය උතුරු ප්රදේශවල ආරක්ෂාව තර කිරීමට පියවර ගනිමින් සිටී.
