ශ්රී ලංකා නාවික හමුදාවේ වයඹ සහ උතුරුමැද නාවික විධානයන් භාවිත කරන ඉඩම් නිරීක්ෂණය කිරීම සඳහා ආරක්ෂක නියෝජ්ය අමාත්ය විශ්රාමික මේජර් ජෙනරාල් අරුණ ජයසේකර මහතා මන්නාරම් දිස්ත්රික්කයේ ක්ෂේත්ර චාරිකාවක නිරත විය. මෙම සංචාරයට සමුපකාර සංවර්ධන නියෝජ්ය අමාත්ය උපාලි සමරසිංහ සහ පාර්ලිමේන්තු මන්ත්රී මයිල්වාගනම් ජෙගදීස්වරන් යන මහත්වරුන් ඇතුළු පිරිසක් එක්ව සිටියහ.මන්නාරම් දිස්ත්රික්කය තුළ මත්ද්රව්ය උවදුර මැඩපැවැත්වීම සහ මුහුදු සීමාවන්ගේ ආරක්ෂාව තහවුරු කිරීම සඳහා නාවික හමුදාව දරන දායකත්වය මෙහිදී අමාත්යවරයාගේ විශේෂ අවධානයට ලක් විය. මන්නාරමේ මුල්ලික්කුලම්, සිලාවතුර, තලෙයිමන්නාරම, වන්කාලපාඩුව සහ පල්ලිමුනෙයි යන ප්රදේශවල නාවික හමුදාව භාවිත කරන ඉඩම් නිරීක්ෂණය කිරීමෙන් අනතුරුව, එම ප්රදේශවාසීන් හමුවී ඔවුන්ගේ නිවාස ගැටලු, ධීවර කර්මාන්තයේ අභියෝග සහ සුබසාධන අවශ්යතා පිළිබඳව අමාත්යවරයා පුළුල් ලෙස සාකච්ඡා කළේය. අදාළ ගැටලු විසඳීම සඳහා රාජ්ය බලධාරීන් සමඟ සම්බන්ධීකරණය වෙමින් ගත හැකි ක්රියාමාර්ග පිළිබඳව ද ඔහු මෙහිදී උපදෙස් ලබා දුන්නේය.
