දේශීය මූල්ය වෙළෙඳපොළේ කෙටි කාලීන පොලී අනුපාතික හැසිරවීම සහ ද්රවශීලතාව කළමනාකරණය කිරීම අරමුණු කරගනිමින්, එක්දින ප්රතිපත්ති පොලී අනුපාතිකය පදනම් අංක 100කින් (1.00%) ඉහළ නැංවීමට ශ්රී ලංකා මහ බැංකුවේ මුදල් ප්රතිපත්ති මණ්ඩලය තීරණය කර තිබේ.
නිවේදනයක් නිකුත් කරමින් මහ බැංකුව සඳහන් කරන්නේ දේශීය හා ගෝලීය වශයෙන් වර්ධනය වන නව ආර්ථික තත්ත්වයන් පිළිබඳව දීර්ඝ ලෙස සලකා බැලීමෙන් අනතුරුව මෙම තීරණයට එළඹි බවයි. ඒ අනුව මෙතෙක් සියයට 7.75ක් ලෙස පැවති එක්දින ප්රතිපත්ති පොලී අනුපාතිකය සියයට 8.5 දක්වා ඉහළ යනු ඇත. වත්මන් මැද පෙරදිග අර්බුදය හේතුවෙන් ගෝලීය වෙළෙඳපොළේ ඛනිජ තෙල් ඇතුළු අත්යවශ්ය භාණ්ඩ මිල ඉහළ යාම ගෝලීය මෙන්ම දේශීය ආර්ථිකයට ද අහිතකර ලෙස බලපා ඇති බව මහ බැංකුව පෙන්වා දෙයි.
මෙම ගෝලීය බලපෑම හමුවේ කලාපයේ සෙසු රටවල මුදල් ඒකක මෙන්ම ශ්රී ලංකා රුපියල ද දැඩි අවප්රමාණය වීමේ පීඩනයකට මුහුණ දුන් නමුත්, මහ බැංකුව ගත් සාර්ථක පියවර හේතුවෙන් මේ වන විට එම තත්ත්වය යම් මට්ටමකින් ලිහිල් වී තිබේ. එහි ප්රතිඵලයක් ලෙස අද (26) දිනයේ ඇමෙරිකානු ඩොලරයේ විකුණුම් මිල රුපියල් 328.69ක් දක්වා පහත බැසීමට ද සමත් විය. මහ බැංකුවේ ඉදිරි මුදල් ප්රතිපත්ති තීරණය ලබන ජුලි මාසයේ 22 වැනිදා ප්රකාශයට පත් කිරීමට නියමිතය.
