Elephant House සන්නාමය යටතේ මෙහෙයුම් සිදුකරන Ceylon Cold Stores PLC සමාගම, 2025/26 මූල්ය වර්ෂය තුළ එල්ල වූ දැඩි උද්ධමනකාරී පීඩනය සහ අයහපත් කාලගුණික බාධා තමන් වෙත අවශෝෂණය කරගනිමින්, පාරිභෝගිකයා මත පැටවෙන බර අවම කර සිය වෙළෙඳපොළ කොටස (Market Share) සාර්ථකව ආරක්ෂා කරගෙන තිබේ. කෙටිකාලීන ලාභාංශ පුළුල් කරගැනීමට වඩා දිගුකාලීන සන්නාම විශ්වාසය සහ පාරිභෝගික රඳවා ගැනීම (Customer Retention) වෙනුවෙන් සමාගම මෙලෙස Retail මිල ගණන් ඉහළ දැමීමෙන් වැළකී සිටීමට තීරණය කර ඇත.
පසුගිය වසර පුරා දේශීය නිෂ්පාදන අංශයට ගෝලීය වශයෙන් කොකෝවා, කිරි නිෂ්පාදන සහ ඇට වර්ග (Nuts) වැනි අමුද්රව්යවල මිල ගණන් සීඝ්රයෙන් ඉහළ යාම නිසා දැඩි බලපෑමක් එල්ල විය. මීට අමතරව දේශීය වශයෙන් විදුලි ගාස්තු ඉහළ යාම, ඉන්ධන මිල සහ විනිමය අනුපාතිකයේ උච්චාවචනයන් හේතුවෙන් නිෂ්පාදන පිරිවැය අධික ලෙස ඉහළ ගියේය. එමෙන්ම මෙරටට බලපෑ ‘ඩිට්වා’ සුළි කුණාටුව (Cyclone Ditwah) හේතුවෙන් සැපයුම් දාමයන්ට බාධා එල්ල වූ අතර, බීම සහ අයිස්ක්රීම් අලෙවිය වැඩිම කාල සීමාවකදී පාරිභෝගික මිලදී ගැනීම් ද සීමා විය. කෙසේ වෙතත්, මෙම පීඩනය පාරිභෝගිකයා වෙත මුදා නොහැරීම නිසා සමාගමේ පානීය අංශයේ 18%ක සහ රසකැවිලි/අයිස්ක්රීම් අංශයේ 8%ක කැපීපෙනෙන විකුණුම් පරිමා (Volume) වර්ධනයක් සටහන් කරගැනීමට සමාගම සමත්ව ඇත.
මේ සම්බන්ධයෙන් අදහස් දක්වමින් Ceylon Cold Stores PLC හි සභාපති ක්රිෂාන් බාලේන්ද්ර මහතා වාර්ෂික වාර්තාව ඔස්සේ සඳහන් කළේ, අමුද්රව්ය මිල සහ විදුලි ගාස්තු ඉහළ යාම හමුවේ ලාභ ආන්තිකයන් පීඩනයට ලක් වුවද, පාරිභෝගිකයන් ආරක්ෂා කිරීම වෙනුවෙන් පිරිවැය බරෙන් බහුතරයක් සමාගම විසින්ම දැරූ බවයි. තවද, අනාගත ඉල්ලුමට සරිලන පරිදි නිෂ්පාදන ධාරිතාව පුළුල් කිරීම වෙනුවෙන් සමාගම රුපියල් බිලියන 4.78ක ප්රාග්ධන ආයෝජනයක් ද සිදු කර තිබේ.
මෙම උපායමාර්ගික දැක්ම හේතුවෙන් 2025/26 මූල්ය වර්ෂය තුළ සමූහයේ සමස්ත ආදායම 17%කින් ඉහළ ගොස් රුපියල් බිලියන 184.6ක් ලෙස සටහන් වී ඇති අතර, බදු පසු ලාභය 32%ක දැවැන්ත වර්ධනයක් පෙන්වමින් රුපියල් බිලියන 7.89ක් ලෙස වාර්තා වී ඇත. මෙහිදී Keells සුපිරි වෙළෙඳසැල් ජාලය රුපියල් බිලියන 146.57ක ආදායමක් උපයමින් ප්රධාන එන්ජිම බවට පත් වූ අතර, නිෂ්පාදන අංශය රුපියල් බිලියන 38.02ක දායකත්වයක් ලබා දී තිබේ.
