පොලිස්පතිවරයාගේ නාමය අනිසි ලෙස භාවිතා කරමින් ක්රියාත්මක වන සයිබර් තර්ජන සහ කප්පම් ලබා ගැනීමේ ජාලයක් පිළිබඳව ශ්රී ලංකා පොලිසිය විසින් පුළුල් විමර්ශනයක් ආරම්භ කර තිබෙනවා. පොලිස් විශේෂ කාර්ය බලකායේ සයිබර් ආරක්ෂණ සහ විවෘත මූලාශ්ර විමර්ශන ඒකකය, සයිබර් අපරාධ සම්බන්ධීකරණ මධ්යස්ථානය සමඟ එක්ව මෙම ජාලය හෙළිදරව් කර ගෙන ඇති අතර, එහිදී ව්යාජ අත්සන් භාවිත කරමින් සහ පොලිස්පතිවරයා ලෙස පෙනී සිටිමින් මහජනතාව මුළා කිරීමට උත්සාහ දරා ඇති බව අනාවරණය වී තිබෙනවා. මෙම ක්රියාවන් මගින් පොලිස් දෙපාර්තමේන්තුවේ කීර්තිනාමයට සහ මහජන විශ්වාසයට බරපතළ හානියක් සිදුවිය හැකි බැවින්, ඒ පිළිබඳව විමසිලිමත් වන ලෙස බලධාරීන් ජනතාවගෙන් ඉල්ලා සිටිනවා.
මෙම වංචනික ක්රියාවන්ගෙන් ආරක්ෂා වීම සඳහා ජනතාව අනුගමනය කළ යුතු පියවර කිහිපයක් ද පොලිසිය විසින් පෙන්වා දී තිබෙනවා. කිසිදු විටෙක එවැනි පණිවිඩවලට බිය නොවන ලෙසත්, සැක සහිත තර්ජනාත්මක පණිවිඩවලට ප්රතිචාර නොදක්වා ඒවායේ ඉල්ලා සිටින මුදල් ලබා දීමෙන් වළකින ලෙසත් උපදෙස් ලබා දී තිබෙනවා. එමෙන්ම, මෙවැනි ඊමේල්වල අඩංගු සබැඳි (Links) මත ක්ලික් කිරීමෙන් වැළකී සිටීම අත්යවශ්ය වන අතර, යම් සිදුවීමක් වාර්තා වුවහොත් වහාම ළඟම ඇති පොලිස් ස්ථානයට, පරිගණක අපරාධ විමර්ශන කොට්ඨාසයට හෝ පොලිස් විශේෂ කාර්ය බලකායට දැනුම් දෙන ලෙස පොලිසිය අවධාරණය කරනවා. වංචනිකයින් හඳුනාගෙන ඔවුන්ට එරෙහිව නීතිය තදින්ම ක්රියාත්මක කිරීමට අවශ්ය සියලු පියවර ගෙන ඇති බවද ශ්රී ලංකා පොලිසිය සහතික වෙනවා.
