ගෙවී ගිය වසර එකහමාරක වැනි කෙටි කාලයක් තුළ රජය විසින් මෙරට ආර්ථිකය ස්ථාවර කර ජනතාවගේ වාහන සිහිනය සැබෑ කර ඇති බව නියෝජ්ය අමාත්ය නලින් හේවගේ මහතා පවසයි. උත්සව සභාවක් අමතමින් ඔහු සඳහන් කළේ, වසර පහක පමණ කාලයක් තිස්සේ නතර කර තිබූ වාහන ආනයනය යළි ආරම්භ කරමින් පසුගිය වසරේ පමණක් ඩොලර් බිලියන 2ක වාහන ආනයනය කර ඇති බවයි.බංකොලොත් වූ රටක් ලෙස පැවති අවදියක, 2025 වසර සඳහා ගෙවිය යුතු ඩොලර් බිලියන 5.1ක ණය වාරිකයද ගෙවීමට රජය සමත් වූ බවත්, ඒ අතරතුර ජනතාවට සහන රැසක් දීමට කටයුතු කළ බවත් අමාත්යවරයා අවධාරණය කළේය.
රාජ්ය සේවකයින් ලක්ෂ 13කට අධික පිරිසකගේ වැටුප් වසර තුනක් අඛණ්ඩව වැඩි කිරීමට පියවර ගෙන ඇති අතර, අදියර දෙකකින් බිලියන 220ක් ඒ සඳහා වෙන් කර ඇත.පෞද්ගලික අංශයේ අවම වැටුප රුපියල් 2000 සිට 3000 දක්වාත්, වතු කම්කරු දෛනික වැටුප රුපියල් 1350 සිට 1750 දක්වාත් වැඩි කර ඇත.
පාසල් දරුවන් සඳහා පොත්පත් සහ ඇඳුම් වලට අමතරව රුපියල් 6500ක දීමනාවක් ලබා දීමටත්, විශ්වවිද්යාල සිසුන්ගේ මහපොළ ශිෂ්යත්වය රුපියල් 5000 සිට 10,000 දක්වා දෙගුණයකින් වැඩි කිරීමටත් කටයුතු කර ඇත.
‘අස්වැසුම’ ප්රතිලාභීන් සංඛ්යාව ලක්ෂ 20 දක්වා වැඩිකර ඇති අතර, වැඩිහිටි දීමනාව රුපියල් 3000 සිට 5000 දක්වාත්, ආබාධිත දීමනාව රුපියල් 25,000 දක්වාත් ඉහළ නංවා තිබේ.
ආර්ථිකය විනාශ වීමට බලපෑ වැරදි දේශපාලන සංස්කෘතිය වෙනස් කිරීමට රජය පියවර ගත් බව පැවසූ නියෝජ්ය අමාත්යවරයා, කුඩා විද්යාත්මක කැබිනට් මණ්ඩලයක් පත් කිරීම, මන්ත්රී විශ්රාම වැටුප් ලබා නොගැනීම සහ වෛද්ය රක්ෂණ ගාස්තු අඩු කිරීම වැනි පියවර හරහා රජය ආදර්ශයක් දී ඇති බවද පෙන්වා දුන්නේය. මැදපෙරදිග යුද්ධය, ස්වභාවික විපත් සහ ගෝලීය ආර්ථික අභියෝග මධ්යයේ වුවද රටෙහි පෝලිම් යුගය අවසන් කර ප්රශ්න විසඳීමට රජය කැපවී සිටින බව ඔහු වැඩිදුරටත් සඳහන් කළේය.
