මාතර නිල්වලා ගඟ ආශ්රිත ලවණ බාධකය හේතුවෙන් ඇති වූ ගංවතුර තත්ත්වයෙන් 2019 වසරේ සිට 2022 වසර දක්වා අනුක්රමික කන්න 7ක් පුරා වගා කිරීමට නොහැකි වූ ගොවි ජනතාව වෙනුවෙන් වන්දි ලබා දීම ජනාධිපති අනුර කුමාර දිසානායක මහතාගේ ප්රධානත්වයෙන් මාලිම්බඩදී සිදු කෙරිණි. ජනතාවගේ ක්ෂණික ගැටලුවලට විසඳුම් ලබා දෙන අතරම ඔවුන්ගේ ආර්ථිකය ශක්තිමත් කිරීමේ වැඩපිළිවෙළ රජය විසින් ආරම්භ කර ඇති බව ජනාධිපතිවරයා මෙහිදී අවධාරණය කළේය.
පසුගිය රජයන් විසින් නිසි විසඳුම් ලබා නොදුන් මෙම ගැටලුවට වත්මන් රජය විසින් 2026 අයවැය මගින් රුපියල් මිලියන 1200ක ප්රතිපාදන වෙන් කරන ලදී. වගා හානි පිළිබඳව ගොවිජන සේවා මධ්යස්ථාන වෙත නිසි පරිදි වාර්තා කර ඇති ගොවීන් වෙනුවෙන් අක්කර 12,800ක් සඳහා මෙම වන්දි හිමි වේ. සංකේතාත්මකව ගොවීන් 250කට වන්දි ලබා දුන් අතර, ඉදිරි දින 14 ඇතුළත සියලු වන්දි ගෙවා අවසන් කිරීමට අපේක්ෂා කෙරේ.
ජනාධිපතිවරයා වැඩිදුරටත් සඳහන් කළේ ජනතාවට වග කියන මෙම රජය පලවා හැරීමට සිහින දකින්නේ හොරුන්, වංචනිකයන් සහ මත්ද්රව්ය ජාවාරම්කරුවන් පමණක් බවත්, වත්මන් ආණ්ඩුව තව තවත් ජනතා විශ්වාසය දිනා ගනිමින් ඉදිරියටම යන බවත්ය.
කර්මාන්ත සහ ව්යවසායකත්ව සංවර්ධන ඇමැති සුනිල් හඳුන්නෙත්ති මහතා ප්රකාශ කළේ නිල්වලා ගැටලුවට ස්ථිර විසඳුම් ලබා දීම සඳහා විශේෂඥ කමිටුවක් පත් කර ඇති බවත්, වසර අවසන් වන විට ශක්යතා අධ්යයනයක් මගින් ලවණ බාධකයේ ගැටලුවට විසඳුම් ලබා දෙන බවත්ය. තවද, කුඩා ව්යාපාරිකයන් සඳහා රුපියල් මිලියන 90,000ක් සහ ග්රාමීය ආර්ථිකය ශක්තිමත් කිරීමට ප්රජා ශක්ති වැඩසටහන වෙනුවෙන් රුපියල් බිලියන 25ක් වෙන් කර ඇති බව ද ජනාධිපතිවරයා පැවසීය. දිවයින පුරා පාසල් නවීකරණය සහ වෘත්තීය පුහුණු මධ්යස්ථාන 50ක් ඉදි කරමින් පුළුල් අධ්යාපන පරිවර්තනයක් ඇති කිරීමට ද රජය සැලසුම් කර ඇත.
