යුරෝපා සංගමයේ පරීක්ෂණ වාර්තා 150කට අධික ප්රමාණයක් මගින් වීසා අයදුම්පත් භාරගන්නා දැවැන්ත ආයතනයක් වන VFS Global හි මෙහෙයුම් කටයුතු පිළිබඳ බරපතල ගැටලු මතු වී තිබේ. 2020 සිට 2025 දක්වා කාලය තුළ යුරෝපා සංගමයේ සාමාජික රටවල් 20ක සිදුකළ පරීක්ෂණ මගින් මෙම තොරතුරු අනාවරණය වී ඇති අතර, නෙදර්ලන්තයේ පදනම් වූ Lighthouse Reports ආයතනය විසින් මෙම වාර්තා ප්රසිද්ධියට පත් කර ඇත.
ප්රධාන ගැටලුවක් ලෙස පෙන්වා දී ඇත්තේ අයදුම්කරුවන්ගේ පෞද්ගලික සහ ජෛවමිතික දත්ත ආරක්ෂා කිරීමේ පවතින දුර්වලතාය. දත්ත ගබඩා කිරීමේදී ඒවා සංකේතනය නොකළ සංයුක්ත තැටිවල තැන්පත් කිරීම සහ විවෘත විද්යුත් තැපැල් හරහා දත්ත හුවමාරු කිරීම වැනි ක්රියා හේතුවෙන් තොරතුරු අවදානමට ලක්ව ඇති බව ලක්සම්බර්ග් තානාපති කාර්යාලය ඇතුළු පාර්ශ්වයන් පෙන්වා දී ඇත. එසේම, සංවේදී තොරතුරු අඩංගු පැරණි තැටි විනාශ නොකර තබා ගැනීම ද බරපතල අතපසුවීමක් ලෙස වාර්තා වේ.
මීට අමතරව වීසා අයදුම් කිරීමේදී සිදුවන වංචනික ක්රියාවන් පිළිබඳව ද මෙම වාර්තා මගින් හෙළි වේ. විශේෂයෙන්ම අහමදාබාද්, චන්දිගාර් සහ ජලන්ධර් යන නගරවලදී ව්යාජ රැකියා ගිවිසුම් සහ ව්යාජ වීසා පත්වීම් වෙන්කරවා ගැනීම් බහුලව දක්නට ලැබී ඇත. සමහර අවස්ථාවලදී වීසා අයදුම්කරුවන් වෙනත් රටක් ඉලක්ක කරගෙන සංචාරය කිරීමට සැලසුම් කළද, වීසා පහසුවෙන් ලැබෙන රටක් ලෙස ලක්සම්බර්ග් වැනි රටවල් පෙන්වා දෙමින් අයදුම් කිරීම හෙවත් ‘වීසා සාප්පු සවාරි’ ක්රියාවලියක් සිදුවන බවද පරීක්ෂකයන් නිරීක්ෂණය කර තිබේ.
නීතිමය අනුකූලතාව සම්බන්ධයෙන් ද ප්රශ්න මතු වී ඇති අතර, ඉන්දියාවේ පවතින VFS මධ්යස්ථාන යුරෝපා සංගමයේ දත්ත ආරක්ෂණ නියාමනයන්ට (GDPR) පූර්ණ ලෙස අනුකූල නොවන බව ජර්මනිය සහ පෝලන්තය ඇතුළු රටවල් කළ ඇගයීමකදී හෙළි වී ඇත. තවද, මුදල් ආපසු ගෙවීමේ ක්රියාවලියේ පවතින අකාර්යක්ෂමතාව සහ කාර්යාලවල පෞද්ගලිකත්වයට හානි වන අයුරින් කටයුතු සිදුවීම වැනි ගැටලු ස්විට්සර්ලන්ත සහ ස්වීඩන් පරීක්ෂකයන් විසින් පෙන්වා දී තිබේ.
