පෞද්ගලික බැංකුවක පොදු ලෙජර් ගිණුම හරහා රුපියල් බිලියන 13ක මුදලක් වංචා කිරීමේ සිද්ධිය සම්බන්ධයෙන් සිදු කෙරෙන විමර්ශනවලදී, අදාළ බැංකුවේ අභ්යන්තර සහ බාහිර විගණන වාර්තාවල මෙම ප්රශ්නගත සිද්ධියට සම්බන්ධ අංශයේ කිසිදු විගණනයක් සිදුකර නොමැති බව අපරාධ පරීක්ෂණ දෙපාර්තමේන්තුවේ පරිගණක විමර්ශන ඒකකය අද (29) කොළඹ ප්රධාන මහේස්ත්රාත් අසංග එස්. බෝදරගම මහතා හමුවේ ප්රකාශ කළේය.
මෙම සිද්ධියට අදාළ අභ්යන්තර සහ බාහිර විගණන වාර්තා විමර්ශන කටයුතු සඳහා ලබාදෙන ලෙස මීට පෙර අධිකරණය නියෝග කර තිබූ අතර, එම නියෝගය අනුව සිදුකළ පරීක්ෂණවලදී එම තොරතුරු අනාවරණය විය. බැංකුවේ අභ්යන්තර, බාහිර සහ ශ්රී ලංකා මහ බැංකුව විසින් සිදුකරන ලද විගණන වාර්තා කිසිවක ගෙවීම් හා පියවීම් අංශයේ විගණන ඇතුළත් වී නොමැති බව විමර්ශන නිලධාරීන් අධිකරණයට පෙන්වා දුන්නේය.
මෙම කරුණු සැලකිල්ලට ගත් මහේස්ත්රාත්වරයා, අදාළ පොදු ලෙජර් ගිණුම සහ අවිනිශ්චිත ගිණුම් භාරව සිටි බැංකුවේ ජ්යෙෂ්ඨ නිලධාරීන්ගෙන් ප්රකාශ සටහන් කර ගන්නා ලෙසත්, ඔවුන් අතින් යම් අපරාධමය වරදක් සිදුව ඇති බවට අනාවරණය වුවහොත් වහාම අත්අඩංගුවට ගෙන අධිකරණයට ඉදිරිපත් කරන ලෙසත් අපරාධ පරීක්ෂණ දෙපාර්තමේන්තුවට නියෝග කළේය.
එමෙන්ම, මෙම සිද්ධියට අදාළව දැනට රක්ෂිත බන්ධනාගාරගත කර සිටින සියලු සැකකරුවන් ලබන 12 වැනි දින දක්වා තවදුරටත් රක්ෂිත බන්ධනාගාරගත කිරීමට නියෝග කෙරිණි. නීතිපතිවරයා වෙනුවෙන් අතිරේක සොලිසිටර් ජනරාල් ජනක බණ්ඩාර මහතා අධිකරණයේ පෙනී සිටියේය.
