ශ්රී ලංකා ප්රජාතාන්ත්රික සමාජවාදී ජනරජයේ ආණ්ඩුව සහ මාලදිவයින් ජන රජයේ ආණ්ඩුව අතර සාපරාධී කාරණාවලදී අන්යෝන්ය නෛතික සහයෝගීතාව දැක්වීම වෙනුවෙන් අත්සන් කරන ලද විශේෂ ගිවිසුමකට අදාළ නියමයන් සඳහා අධිකරණ සහ ජාතික ඒකාබද්ධතා කටයුතු පිළිබඳ අමාත්යාංශයීය උපදේශක කාරක සභාවේ නිල අනුමැතිය හිමිව තිබේ. අධිකරණ සහ ජාතික ඒකාබද්ධතා කටයුතු පිළිබඳ ගරු අමාත්ය (නීතිඥ) හර්ෂණ නානායක්කාර මහතාගේ සභාපතිත්වයෙන් යුතුව මෙම කාරක සභාව පසුගියදා පාර්ලිමේන්තු පරිශ්රයේදී රැස්වූ අවස්ථාවේදී මෙම තීරණයට එළඹ ඇත. 2002 අංක 25 දරන සාපරාධී කාරණාවල දී අන්යෝන්ය සහයෝගිතාව දැක්වීමේ පනත යටතේ 2025 වසරේ ජුලි මස දී දෙරට අතර අත්සන් තබන ලද මෙම ගිවිසුමට අදාළ නියමය, 2026 ජනවාරි 05 දිනැති අංක 2470/04 දරන අති විශේෂ ගැසට් පත්රයේ ප්රකාශයට පත් කිරීමෙන් අනතුරුව පසුගිය 2026.05.19 වන දින පාර්ලිමේන්තුවට ඉදිරිපත් කර තිබුණකි.
මෙම ද්විපාර්ශ්වික ගිවිසුම මඟින් ශ්රී ලංකාව සහ මාලදිவයින යන දෙපාර්ශවයටම සාපරාධී කාරණාවලදී අන්යෝන්ය නෛතික සහයෝගීතාව වඩාත් පුළුල් හා ඵලදායී ලෙස ඉටු කිරීමට මඟ පාදනු ඇත. ඒ අනුව, අදාළ අති විශේෂ ගැසට් පත්රයේ සඳහන් පරිදි, ත්රස්තවාදයට සම්බන්ධ අපරාධ සහ ත්රස්තවාදය සඳහා මුදල් සැපයීමට භාවිත කිරීමට අදහස් කරන අරමුදල් සොයා ගැනීම, අපරාධවලින් උපයා ගන්නා දේ මෙන්ම අපරාධ මෙවලම් සොයා ගැනීම, තහනම් කිරීම, අහිමි කිරීම හෝ රාජසන්තක කිරීම ඇතුළු ක්රියාවලීන් රැසක් මේ යටතේ ආවරණය වේ. මීට අමතරව, විවිධ අපරාධයන් කල්තියා වැළැක්වීම, විමර්ශනය කිරීම, නඩු පැවරීම සහ ඒවා මැඩ පැවැත්වීම සම්බන්ධයෙන් දෙරටේම නීතිමය භූමිකාවන් වඩාත් සක්රීය ලෙස ඉටු කිරීම පිළිබඳව ද මෙමඟින් විශේෂ අවධානයක් යොමු කර ඇත.
මෙම කාරක සභා රැස්වීමේදී මෙරට අධිකරණ ක්ෂේත්රය මුහුණ දී ඇති බරපතළ පරිපාලනමය ගැටලුවක් ද අනාවරණය වූ අතර, එහිදී නිලධාරීන් පෙන්වා දුන්නේ 2018 වසරෙන් පසු මේ දක්වා නිසි ලෙස බඳවා ගැනීම් සිදු නොකිරීම හේතුවෙන් ක්ෂේත්රය තුළ පුරප්පාඩු 2647ක් පවතින බවයි. පවතින මෙම අධිකරණ පුරප්පාඩු සියල්ල කඩිනමින් සම්පූර්ණ කිරීම සඳහා වහාම බඳවා ගැනීම් සිදු කිරීමට පියවර ගන්නා ලෙස අමාත්ය හර්ෂණ නානායක්කාර මහතා මෙහිදී අදාළ බලධාරීන්ට දැඩි ලෙස උපදෙස් ලබා දුන්නේය. මීට අමතරව, කාරක සභාවට සහභාගී වූ මන්ත්රීවරුන් විසින් අධිකරණ, බන්ධනාගාර හා නීති ක්ෂේත්රයට අදාළව පවතින සෙසු ගැටලු ද ඉදිරිපත් කළ අතර, ඒවාට කඩිනම් විසඳුම් ලබා දීමට කාරක සභා සභාපතිවරයා පියවර ගන්නා ලදී. මෙම අවස්ථාව සඳහා ගරු නියෝජ්ය අමාත්ය (නීතිඥ) සුනිල් වටගල මහතා ඇතුළු පාර්ලිමේන්තු මන්ත්රීවරුන් සහ අධිකරණ අමාත්යාංශය නියෝජනය කරමින් උසස් නිලධාරීන් පිරිසක් ද එක්ව සිටියහ.
