උතුම් වෙසක් පුන් පොහෝ දිනට සහ ජාතික පරිසර සතියට සමගාමීව, ශාක සංරක්ෂණ ඉතිහාසයේ සුවිශේෂී පියවරක් තබමින් “අටවිසි බෝධීන් වහන්සේලා රෝපණය කිරීමේ” ජාතික වැඩසටහන අද (මැයි 30) උඩුගම්පොල ශ්රී සුධර්මානන්ද පුරාණ මූල මහා විහාරස්ථානයේදී පැවැත්විණි. පරිසර අමාත්යාංශයේ නිලධාරීන්ගේ ප්රධානත්වයෙන් සහ මහා සංඝරත්නයේ ආශිර්වාද මධ්යයේ මෙම වැඩසටහන දියත් කෙරිණි.
ජගත් පරිසර දිනය නිමිත්තෙන් ක්රියාත්මක වන මෙම ජාතික වැඩපිළිවෙළේ ප්රධාන තේමාව වන්නේ “ආකල්ප ප්රවර්ධනය තුළින් පරිසර සංරක්ෂණය” යන්නයි. පරිසරය ආරක්ෂා කිරීම හුදු නීතිමය ක්රියාමාර්ගයකට පමණක් සීමා නොකර, මිනිස් සිත් තුළ ආධ්යාත්මික හා ගුණාත්මක ආකල්පමය වෙනසක් ඇති කිරීම මෙහි මූලික අරමුණ වේ. බෞද්ධ සංස්කෘතිය තුළ පවතින ශාක වන්දනාව සහ ස්වභාවධර්මය කෙරෙහි ගරු කිරීමේ සම්ප්රදාය පෙරදැරි කර ගනිමින්, බුදුවරුන් විසිඅට නමකගේ බෝධි ඥානය නියෝජනය කරන බෝධීන් වහන්සේලා රෝපණය කිරීම හරහා සමාජයේ පාරිසරික බැඳීම ශක්තිමත් කිරීමට අපේක්ෂා කෙරේ.
මෙය නව රජයේ හරිත ප්රතිපත්තියේ තවත් දිගුවක් වන අතර, අනාගත පරපුර උදෙසා වනාන්තර ඝනත්වය ඉහළ නැංවීම, වඳවී යන ශාක සංරක්ෂණය සහ නාගරික හා ග්රාමීය කලාප හරිතකරණය කිරීමේ දීර්ඝකාලීන ජාතික වැඩපිළිවෙළක් ලෙස මෙය ක්රියාත්මක වේ. මෙම වැඩසටහන යටතේ රෝපණය කෙරෙන නා, සල්, කුඹුක්, මුරුත, මාර, දිවුල් සහ ඇසතු වැනි වෘක්ෂයන් ඉහළ පාරිසරික, ඖෂධීය සහ ජෛව විවිධත්ව වටිනාකමකින් සමන්විත වේ. පරිසර අමාත්යාංශයේ අතිරේක ලේකම්වරුන් වන අංජලී කුමාරගම සහ සුධීර ජයරත්න යන මහත්ම මහත්මීන් ඇතුළු පිරිසක් මෙම අවස්ථාවට එක්ව සිටියහ.
