ශ්රී ලංකා කාන්තා ක්රිකට් කණ්ඩායමේ උපදේශකවරියක ලෙස කටයුතු කළ ඔලිම්පික් පදක්කම්ලාභී සුසන්තිකා ජයසිංහ මහත්මියට එම තනතුර අහිමි වී ඇති බව වාර්තා වේ. ක්රීඩා අමාත්යවරයා විසින් පත් කරන ලද ඉරාන් වික්රමරත්න මහතාගේ ප්රධානත්වයෙන් යුත් ක්රිකට් ප්රතිසංස්කරණ කමිටුව විසින් පසුගිය සතියේ ගත් තීරණයකට අනුව මෙම පියවර ගෙන තිබේ. පැහැදිලි මෙහෙයුම් අවශ්යතාවයකින් තොරව ශ්රී ලංකා ක්රිකට් ආයතනයෙන් වැටුප් ලබාගත් විශාල පිරිසකගේ සේවය අත්හිටුවීමට එම කමිටුව තීරණය කර ඇත.
මෙම කප්පාදුව හේතුවෙන් උපදේශකයින් සහ සම්බන්ධීකාරකවරුන් ලෙස සේවය කළ පිරිසකට සිය රැකියා අහිමි වී ඇති අතර, දිස්ත්රික් හා පළාත් සංගම් හරහා පත්කර වැටුප්වලට සමාන දීමනා සහ රක්ෂණාවරණ ලබාගත් පිරිසක් ද ඊට ඇතුළත් වේ. සුසන්තිකා ජයසිංහ මහත්මිය මෙම තනතුරට පත්වූයේ ක්රීඩා අමාත්යාංශයෙන් ඇයට ලැබුණු මාසික දීමනාව අත්හිටුවීමෙන් පසු, ශ්රී ලංකා ක්රිකට් ආයතනයේ හිටපු සභාපති ශම්මි සිල්වා මහතාගේ මැදිහත්වීම මතය.
ශ්රී ලංකාවේ ජීවතුන් අතර සිටින එකම ඔලිම්පික් පදක්කම්ලාභිනිය ලෙස ඇයට රාජ්ය අනුග්රහයක් හෝ විශ්රාම වැටුපක් ලබාදීම රජයේ වගකීමක් බව ක්රීඩා ක්ෂේත්රයේ බොහෝ දෙනාගේ මතයයි. එවැනි පසුබිමක ශම්මි සිල්වා මහතා ඇයට රැකියාවක් ලබාදීම අගය කළ යුතු පියවරක් ලෙස සැලකේ. කෙසේ වෙතත්, මෑතකදී ඕස්ට්රේලියාවේ සිට මෙරටට පැමිණි ඇය, ඉහළ ජීවන වියදම හේතුවෙන් එරට රැඳී සිටීමට නොහැකිව ආපසු පැමිණි අයෙකි. මෙම රැකියා කප්පාදුව ඔලිම්පික් පදක්කම්ලාභිනියකගේ ජීවනෝපායට ද බලපෑමක් වීම බොහෝ දෙනාගේ කනස්සල්ලට හේතු වී තිබේ.
