චීන අග්රාමාත්ය ලි චියැං මහතා විසින් විදේශ රටවල සිදු කෙරෙන චීන ආයෝජන සඳහා නව රෙගුලාසියක් නිකුත් කර ඇති අතර, එය 2026 වසරේ ජූලි මස 01 වැනිදා සිට බලාත්මක වීමට නියමිතය. මෙම නව රෙගුලාසියේ ප්රධාන අරමුණ වන්නේ විවෘතභාවය සහ උසස් තත්ත්වයේ ආයෝජන සංවර්ධනය ප්රවර්ධනය කිරීම, ආයෝජකයන්ගේ නීත්යනුකූල අයිතිවාසිකම් සහ අවශ්යතා ආරක්ෂා කිරීම, මෙන්ම චීනයේ ජාතික ස්වෛරීභාවය, ආරක්ෂාව සහ සංවර්ධන අවශ්යතා සුරක්ෂිත කිරීමයි.
වගන්ති 34කින් සමන්විත මෙම නීති මාලාව මගින් ජාත්යන්තර ආර්ථික සහ වෙළඳ නීති සමඟ පෙළගැසීම, එක් තීරයක් සහ එක් මාවතක් සහයෝගීතාව ශක්තිමත් කිරීම සහ ජාත්යන්තර කාර්මික හා සැපයුම් දාමයන්හි සහයෝගීතාව ප්රවර්ධනය කිරීම සිදු කෙරේ. වෙළඳපළ ප්රතිපත්තීන්ට අනුකූලව ජාත්යන්තර තරඟකාරිත්වයට සහ සහයෝගීතාවයට සහභාගී වීමට ආයෝජකයින්ට චීනය සහාය ලබා දෙනු ඇත. අදාළ බලධාරීන්, වෘත්තීය ආයතන, කර්මාන්ත සංගම් සහ ආයෝජන ප්රවර්ධන සංවිධාන හරහා ආයෝජකයින්ට ලබා දෙන සේවාවන් පුළුල් කර වැඩිදියුණු කිරීමට ද පියවර ගනු ඇත.
විදේශ ආයෝජනවල ආරක්ෂාව සහ සුරක්ෂිතභාවය ඉහළ නැංවීමට, ආයෝජකයන්ගේ වගකීම් තහවුරු කිරීමට සහ වෙළඳපළ ක්රියාකාරිත්වයට සිදුවන බාධා වැළැක්වීමට මෙම නීති මගින් අවධාරණය කරයි. මීට අමතරව, ජාත්යන්තර ආර්ථික සහ වෙළඳ ගිවිසුම් සාකච්ඡා කිරීම මෙන්ම විවිධ යාන්ත්රණ හරහා ආයෝජන ආරවුල් විසඳීම දිරිමත් කිරීම ද මෙම රෙගුලාසිය යටතේ සිදු කෙරේ.
