අනිවාර්ය හමුදා සේවයට එරෙහිව සහ හමුදාව මඟහරින පුද්ගලයින් අත්අඩංගුවට ගැනීමට එරෙහිව ඊශ්රායලය පුරා පසුගිය සඳුදා (01) දහස් ගණනක් වූ අතිධාවනීය (Ultra-Orthodox/Haredi) යුදෙව්වන් දැවැන්ත විරෝධතාවල නිරත විය. ප්රධාන මාර්ග, දුම්රිය මාර්ග සහ ජෙරුසලමේ පිවිසුම් මාර්ග අවහිර කරමින් සහ පොලිසිය සමඟ ගැටුම් ඇති කර ගනිමින් සිදුකළ මෙම විරෝධතා හේතුවෙන් ජෙරුසලම සහ ටෙල් අවිව් නගරවල ජන ජීවිතය දැඩි ලෙස අකර්මන්ය වී තිබේ.
විරෝධතාකරුවන් විසින් ප්රධාන මංසන්ධි අවහිර කිරීම, පොලිස් ස්ථානයකට කඩා වැදීමට උත්සාහ කිරීම සහ හමුදා සෙබළුන්ට පහරදීම වැනි ප්රචණ්ඩකාරී ක්රියා වාර්තා විය. පොලිසිය ජල ප්රහාරක සහ අශ්වාරෝහක බලකායන් යොදවමින් විරෝධතාකරුවන් විසුරුවා හැරීමට පියවර ගත්තේය.
2024 වසරේ ශ්රේෂ්ඨාධිකරණය විසින් ලබාදුන් තීන්දුවකට අනුව, හාරෙඩි ප්රජාවට හමුදා සේවයෙන් ලබාදී තිබූ නිදහස් කිරීම් අවලංගු කර ඇති අතර, ඔවුන් අනිවාර්යයෙන්ම හමුදාවට බැඳිය යුතු බව නියෝග කර ඇත. ගාසා, ලෙබනන් සහ සිරියානු දේශසීමා ආශ්රිතව මෙන්ම ඉරානය සමඟ පවතින ගැටුම් හේතුවෙන් ඊශ්රායල හමුදාව දැඩි පිරිස් බල හිඟයකට මුහුණ දී සිටී. යුද හමුදා මාණ්ඩලික ප්රධානියා අනතුරු අඟවා ඇත්තේ පිරිස් බලය නොමැතිව හමුදාව අකර්මන්ය වීමේ අවදානමක් පවතින බවයි.
හමුදා බඳවා ගැනීමේ පනත සම්බන්ධයෙන් පවතින මතභේද නිසා අගමැති බෙන්ජමින් නෙතන්යාහුගේ ආණ්ඩුව දැඩි අර්බුදයකට ලක්ව ඇති අතර, 2026 වසරේ අවසානයේ මැතිවරණයක් පැවැත්වීමේ දැඩි අවදානමක් මතුව ඇත. තමන් හමුදාවට බැඳීමෙන් තම ආගමික සිරිත් විරිත් සහ ජීවන රටාව බිඳවැටෙනු ඇතැයි හාරෙඩි ප්රජාව විශ්වාස කරන අතර ඔවුන් මෙම සටන තම පැවැත්ම උදෙසා කරන යුද්ධයක් ලෙස දකී.
දැනට පවතින වාර්තාවලට අනුව, විරෝධතා අතරතුර පොලිස් නිලධාරීන් තිදෙනෙකු සුළු තුවාල ලබා ඇති අතර, ප්රචණ්ඩ ක්රියා සම්බන්ධයෙන් කිහිප දෙනෙකු අත්අඩංගුවට ගෙන තිබේ. අධිකරණ තීන්දුව ක්රියාත්මක කිරීම සහ හමුදාවට අවශ්ය පිරිස් බලය ලබා ගැනීම අතර පවතින මෙම ගැටුම, ඊශ්රායලයේ අභ්යන්තර දේශපාලන සහ සමාජ ව්යුහය තවදුරටත් බෙදීමකට ලක් කරමින් පවතී.
