නවසීලන්තයේ අගනුවර වන වෙලින්ටන් නගරයේ අයිලන්ඩ් බේ ප්රදේශයේ නිවාස කිහිපයකට පසුගියදා රාත්රියේ ඇති වූ දරුණු කුණාටු තත්ත්වය හේතුවෙන් මළපහ සහ සනීපාරක්ෂක ද්රව්ය මිශ්ර අපද්රව්ය ගලා ඒමේ අවදානම් තත්ත්වයක් උද්ගත විය. වෙලින්ටන් වෝටර් ආයතනය පවසන පරිදි නගරයේ ප්රධාන අපද්රව්ය නල මාර්ගයක හටගත් අවහිරතාවක් මෙම ගැටලුවට ප්රධාන හේතුව වී ඇත.
මෙම සිදුවීමෙන් නිවාස පහක් දැඩි ලෙස අපවිත්ර වී ඇති අතර, එම නිවාස පිරිසිදු කිරීමට සහ විෂබීජහරණය කිරීමට කටයුතු කරමින් පවතින බව නිලධාරීන් තහවුරු කරයි. පීඩාවට පත් ප්රදේශයේ දැනටමත් අපද්රව්ය ඉවත් කිරීම සඳහා විශේෂ රථ යොදවා ඇති අතර බලපෑමට ලක් වූ නිවාස හිමියන්ට අවශ්ය සහාය ලබා දීමට කටයුතු කරමින් සිටී.
පසුගිය රාත්රියේ පැවති තද වැසි සහ අකුණු සැර පන්දහසකට වැඩි සංඛ්යාවක් හේතුවෙන් වෙලින්ටන් නගරයේ මෝවා පොයින්ට් අපද්රව්ය පවිත්රාගාරයේ ක්රියාකාරීත්වය ද යළිත් වරක් අඩපණ වී තිබේ. පෙබරවාරි මාසයේ සිට මෙම පවිත්රාගාරයේ ඇතිවී තිබෙන තාක්ෂණික දෝෂ හේතුවෙන් සැකසූ අපද්රව්ය සමුද්රයට මුදා හැරීම සිදුවන අතර, පූර්ණ වශයෙන් පවිත්රාගාරය යථා තත්ත්වයට පත් කිරීම නොවැම්බර් මාසය වන තෙක් කල් යනු ඇත.
මේ හේතුවෙන් වෙලින්ටන් දකුණු වෙරළ තීරයේ මුහුදු ජලය අපවිත්ර වී ඇති බැවින් තාරකේනා බොක්ක ඇතුළු වෙරළ තීරයන් ආසන්නයේ ගැවසීමෙන් සහ ජල ක්රීඩාවල නිරත වීමෙන් වළකින ලෙස බලධාරීන් ජනතාවට දැඩිව අවවාද කර ඇත.
