සමාජ මාධ්ය හරහා තහනම් එල්ටීටීඊ සංවිධානය ප්රවර්ධනය වන අයුරින් අන්තර්ගතයන් ප්රචාරය කිරීමේ සිද්ධියක් සම්බන්ධයෙන් සැකකරුවෙකු අත්අඩංගුවට ගැනීමෙන් අනතුරුව, රට පුරා සංගීත ප්රසංග තහනම් කර ඇති බවට සමාජ මාධ්ය ඔස්සේ පැතිර යන තොරතුරු සම්පූර්ණයෙන්ම අසත්ය බව ශ්රී ලංකා පොලිසිය නිවේදනය කරයි.
පොලිසිය අවධාරණය කරන්නේ, කිසිදු ආකාරයකින් පොදු සංගීත ප්රසංග හෝ විනෝදාස්වාද උත්සව තහනම් කිරීමට පියවර ගෙන නොමැති බවයි. කෙසේ වෙතත්, මෙරට නීතියට අනුව තහනම් කරන ලද සංවිධාන හෝ ඒවායේ මතවාද, සංකේත සහ ක්රියාකාරකම් උත්කර්ෂයට නැංවීම හෝ ප්රවර්ධනය කිරීම නීති විරෝධී ක්රියාවක් බව පොලිසිය සිහිපත් කරයි.
එබැවින්, සමාජ මාධ්ය ඔස්සේ මෙවැනි අසත්ය තොරතුරු පතුරුවා හරිමින් මහජනතාව නොමඟ යවන පුද්ගලයින් සම්බන්ධයෙන් දැඩි අවධානයෙන් පසුවන බවත්, නීතිය උල්ලංඝනය කරන ඕනෑම අයෙකුට එරෙහිව නීත්යානුකූලව කටයුතු කිරීමට පසුබට නොවන බවත් පොලිස් මූලස්ථානය වැඩිදුරටත් දන්වා සිටියි.
මෙම සිද්ධිය මූලික කරගෙන අසත්ය ප්රචාරවල නොරැවටෙන ලෙසත්, නිවැරදි තොරතුරු සඳහා පමණක් විශ්වාසදායක මූලාශ්ර කෙරෙහි අවධානය යොමු කරන ලෙසත් පොලිසිය මහජනතාවගෙන් ඉල්ලා සිටී.
