ඇමෙරිකානු ඩොලරයේ අගය දිනෙන් දින ශීඝ්රයෙන් ඉහළ යාම හමුවේ මෙරට උද්ධමනය යළිත් වරක් සාමාන්ය ජනතාවට දරාගත නොහැකි මට්ටමකට පත්ව ඇති බව පෙන්වා දෙන පාර්ලිමේන්තු මන්ත්රී මුජිබර් රහුමාන් මහතා, මෙරට සමස්ත ජාතික ආර්ථිකය 2022 වසරේ පැවති බරපතළ හා ඛේදනීය අගාධය දෙසටම යළිත් වේගයෙන් ගමන් කරමින් පවතින බවට බරපතළ අනතුරු ඇඟවීමක් කරයි. ආනයනික අත්යවශ්ය භාණ්ඩ පමණක් නොව කිරි සහ යෝගට් වැනි දේශීය කෘෂිකාර්මික නිෂ්පාදනවල මිල පවා වර්තමානයේ අසාමාන්ය ලෙස ඉහළ ගොස් ඇති බවත්, මීට සමගාමීව ඉන්ධන හා විදුලි ගාස්තු වරින් වර ඉහළ දැමීම හමුවේ පොදු ජනතාවගේ දෛනික ජීවන තත්ත්වය දැඩි අවදානමකට ලක්ව ඇති බවත් මන්ත්රීවරයා පෙන්වා දෙයි. රුපියල් දහසක මුදලකට පෙට්රල් ලීටර් දෙකක්වත් ලබාගත නොහැකි බිඳ වැටුණු වටපිටාවක් තුළ ජනතාවගේ ක්රය ශක්තිය සහ ජීවන තත්ත්වය ශීඝ්රයෙන් කඩා වැටෙමින් පවතින බව හෙතෙම පවසයි.
රටේ ආර්ථිකය නිසි මාවතට (Track) අවතීර්ණ වී ඇති බවට ශ්රී ලංකා මහ බැංකු අධිපතිවරයා මීට මාසයකට පෙර මාධ්ය හමුවේ කළ ප්රකාශය වර්තමාන කටුක වෙළඳපොළ යථාර්ථය හමුවේ මුළුමනින්ම අසත්යයක් වී ඇති බවත්, වත්මන් බැංකු පද්ධතිය තුළ ණයවර ලිපි (LC) විවෘත කිරීමේදී අත්යවශ්ය භාණ්ඩ සඳහා පමණක් සීමා වන ලෙස රජය සහ මහ බැංකුව විසින් වාණිජ බැංකුවලට දැඩි නිල නොවන බලපෑම් එල්ල කරමින් සිටින බවත් මන්ත්රීවරයා මෙහිදී විශේෂ අනාවරණයක් කළේය. වත්මන් මාලිමා රජය විසින් තිරය පිටුපස ක්රියාත්මක කරන මෙම ‘ගජමිතුරු ආර්ථිකය’ තුළ ජනාධිපතිවරයාගේ සමීපතමයන්ට පූර්ව රාත්රී තොරතුරු සහ අභ්යන්තර වාසි ලබා දී මැයි 16 වනදා විශේෂ බදු පැනවීමට හරියටම පෙර දින සුඛෝපභෝගී වාහන 1,700ක් ගෙන්වීමට අවස්ථාව සලසා දීම හරහා රාජ්ය ආදායමට සිදුකර ඇති අතිදැවැන්ත මූල්ය හානිය ද ඔහු දැඩි විවේචනයට ලක් කරයි. පාලකයන්ගේ මෙවැනි වැරදි සහ දූෂිත මූල්ය තීන්දු හේතුවෙන් සමාජයේ ඇති-නැති පරතරය තවදුරටත් පුළුල් වී ඇති බව ඔහුගේ දැඩි ස්ථාවරයයි.
රටේ මූල්ය වෙළඳපොළ තුළ පවතින මෙම දැඩි අවිශ්වාසය වහාම දුරු කරමින් තමන් සතු ඩොලර් නිසි පරිදි දේශීය වෙළඳපොළට මුදා හරින ලෙස ප්රමුඛ අපනයනකරුවන්ගෙන් සහ විදේශ ශ්රමිකයන්ගෙන් විශේෂ ඉල්ලීමක් කරන මන්ත්රීවරයා, ආණ්ඩුවේ වැරදි කළමනාකරණය සහ අදක්ෂතාව හේතුවෙන් අහිංසක ජනතාවට විඳීමට සිදුවන මෙම පීඩනය අවම කිරීමට ජනාධිපතිවරයා ඇතුළු බලධාරීන් වහාම මැදිහත් විය යුතු බව අවධාරණය කරයි. හුදෙක් තමන් වටා සිටින දේශපාලන හිතවතුන් සහ ජාවාරම්කරුවන් පෝෂණය කිරීම වහාම නතර කර, ජනතාවගේ පාරිභෝගික ක්රය ශක්තිය ආරක්ෂා කෙරෙන සැබෑ ආර්ථික ප්රතිසංස්කරණයකට අවතීර්ණ නොවුණහොත්, මෙරට ආර්ථිකය තවදුරටත් පාලනය කළ නොහැකි දරුණු සමාජ අර්බුදයකට හා කැරලි මාවතකට ගොදුරු වනු ඇති බව පවසමින් මුජිබර් රහුමාන් මහතා සිය විවේචනාත්මක විශ්ලේෂණය අවසන් කරයි.
