දරුවකුගේ ඉදිරි අධ්යාපන ගමනේ මඟ තීරණය කරන ප්රධානතම සන්ධිස්ථානය පෙරපාසල් අධ්යාපනය වන බැවින් එහි ගුණාත්මකභාවය තහවුරු කිරීමේ වගකීම රජයක් ලෙස භාරගන්නා බව අග්රාමාත්ය, අධ්යාපන, උසස් අධ්යාපන සහ වෘත්තීය අධ්යාපන අමාත්ය ආචාර්ය හරිනි අමරසූරිය මහත්මිය පවසයි. සියලු පළාත් ආවරණය වන පරිදි පූර්ව ළමාවිය අධ්යාපන කටයුතු නිවැරදි අධීක්ෂණයකට ලක් කළ යුතු බව ද ඇය සඳහන් කළාය.
කුරුණෑගල දිස්ත්රික්කයේ සිදු කළ අධ්යාපන නිරීක්ෂණ චාරිකාව අතරතුර, වයඹ පෙරපාසල් ගුරු පුහුණු විද්යාලයේ 2023/2024 වර්ෂය සඳහා වූ පෙරපාසල් ගුරු පුහුණු ඩිප්ලෝමාධාරිනියන්ට සහතික පත්ර ප්රදානය කිරීම වෙනුවෙන් අද (05) පැවැති උත්සවයකට සහභාගී වෙමින් අග්රාමාත්යවරිය මේ බව ප්රකාශ කළාය. මෙම උත්සවය පෙරපාසල් අධ්යාපන සංවර්ධන අධිකාරිය සහ වයඹ පළාත් සභාව එක්ව සංවිධානය කර තිබුණි.
එහිදී ඉදිරි සැලසුම් පිළිබඳව අදහස් දැක්වූ අග්රාමාත්යවරිය කියා සිටියේ, ඉදිරි වසර කිහිපය තුළ පූර්ව ළමාවිය අධ්යාපනයේ ස්ථාවරත්වයක් ඇති කිරීම සඳහා ජාතික අධ්යාපන කොමිසම, කාන්තා හා ළමා කටයුතු අමාත්යාංශය සහ අධ්යාපන අමාත්යාංශය ඒකාබද්ධව ප්රතිපත්ති, ගුරු පුහුණු නිර්ණායක සහ රෙගුලාසි සම්පාදනය කරමින් සිටින බවයි. මේ වසරේ ආරම්භ කරන ගුරු පුහුණු කටයුතු හරහා 2027 වසර වන විට මුළු රටටම එකම පෙරපාසල් විෂය මාලාවක් (Syllabus) ක්රියාත්මක කිරීමට බලාපොරොත්තු වන බව ඇය අනාවරණය කළාය.
පෙරපාසල් අධ්යාපනයෙන් සිදුවිය යුත්තේ දරුවාගේ ප්රාථමික අධ්යාපනයට අවශ්ය හොඳ සූදානමක් සහ චාලක කුසලතා වර්ධනය කිරීමක් බව පෙන්වා දුන් අග්රාමාත්යවරිය, දරුවාට අනවශ්ය බරක් නොදැනෙන ලෙස වයසට සුදුසු ආකාරයෙන් සමාජශීලීත්වය වර්ධනය කිරීමට ඉඩ සැලසීම වැඩිහිටියන්ගේ වගකීමක් බව කීවාය. පූර්ව ළමාවිය අධ්යාපනයේ සැබෑ අරමුණ පිළිබඳව සමාජය නිවැරදිව දැනුවත් කිරීමේ විශාල කාර්යභාරයක් නව පෙරපාසල් ගුරුවරුන්ට පැවරෙන බව ද ඇය වැඩිදුරටත් අවධාරණය කළාය.
