හොරණ ප්රදේශයේ පිහිටි රාජ්ය බැංකුවක් පරිශ්රය තුළදී පසුගිය 03 වැනිදා සිදුවූ රුපියල් කෝටි තුනහමාරක (රු. මිලියන 35) මුදල් කොල්ලකෑමේ සිද්ධිය, එම බැංකුවේ සහකාර කළමනාකාරවරයා සහ ආරක්ෂක නිලධාරියෙකු එකතු වී ඉතා සැලසුම් සහගතව සිදුකළ රංගනයක් බව විමර්ශනවලදී අනාවරණය වී තිබේ. ඒ අනුව අද (05) අත්අඩංගුවට ගත් මෙම සැකකරුවන් දෙදෙනාට එරෙහිව හෙට (06) රැඳවුම් නියෝග ලබාගැනීමට පෑලියගොඩ උතුරු අපරාධ කොට්ඨාසය කටයුතු කරමින් සිටී.
මෙම සැකකාර සහකාර කළමනාකරු නිරූපිකාවන් ඇතුළු කාන්තාවන් රැසක් ඇසුරු කරමින් අධික ලෙස මුදල් වියදම් කර ඇති බවත්, ඒ හේතුවෙන් ඔහු දැඩි ලෙස ණය වී සිට ඇති බවත් පොලිස් විමර්ශනවලදී හෙළි වී ඇත. සිද්ධිය වූ දින සහකාර කළමනාකරු සහ ආරක්ෂක නිලධාරීන් දෙදෙනෙකු එකතු වී, බැංකුවෙන් පිටතට රැගෙන ගිය රුපියල් 5000 නෝට්ටු අඩංගු මුදල් මලු දෙක පා ගමනින් පැමිණි අයෙකු කොල්ලකා පලාගිය බවට බැංකු කළමනාකරු දැනුවත් කර තිබුණි. කළමනාකරු වහාම ක්රියාත්මක වී 119 හදිසි ඇමතුම් අංශයට මේ බව දැනුම් දී ඇත.
කෙසේ වෙතත්, මුදල් භාරව සිටි සහකාර කළමනාකරුගෙන් ප්රශ්න කිරීමේදී සැකසිතුණු බැවින් පොලිස්පතිවරයා විසින් විමර්ශන බස්නාහිර පළාත් උතුරු අපරාධ කොට්ඨාසය වෙත පැවරිණි. එහි නිලධාරීන් CCTV දර්ශන පරීක්ෂා කිරීමේදී සහකාර කළමනාකරු පෙරවරුවේ සේප්පුවෙන් මුදල් ලබාගත්ත ද, ඉන් පැය කිහිපයකට පසු පස්වරුවේ බැංකුවේ CCTV කැමරා ආවරණය නොවන පැති දොරකින් පිටවීමට උත්සාහ කර ඇති බව අනාවරණය විය. එමෙන්ම අවට කිසිදු කැමරාවක මුදල් මලු රැගෙන යන සැකකටයුතු පුද්ගලයෙකු සටහන් වී නොතිබීම නිසා මෙය ව්යාජ කොල්ලකෑමක් බව තහවුරු කරගැනීමට නිලධාරීන්ට හැකි විය.
මේ අතර, බස්නාහිර පළාත් උතුරු අපරාධ කොට්ඨාසය කළ ඉල්ලීමක් සලකා බැලූ හොරණ ප්රධාන මහේස්ත්රාත් ලක්මිණි විධානගමගේ මහත්මිය, සැකකරුවන්ගේ දුරකථන විශ්ලේෂණ වාර්තා ලබා ගැනීමටත්, ඔවුන්ගේ නිවාස පරීක්ෂා කිරීම සඳහා සෝදිසි වරෙන්තු නිකුත් කිරීමටත් නියෝග කළාය. සිද්ධිය සම්බන්ධයෙන් අත්අඩංගුවට ගෙන ඇත්තේ වෑවල, ගංගොඩ පදිංචි 54 හැවිරිදි සහකාර කළමනාකරු සහ බුලත්සිංහල පදිංචි 43 හැවිරිදි ආරක්ෂක නිලධාරියා වන අතර ඔවුන්ගෙන් වැඩිදුර ප්රශ්න කිරීම් ක්රියාත්මකය.
