යුද්ධයෙන් ජීවිත පරිත්යාග කළ වීරෝධාර රණවිරුවන් සිහිපත් කිරීම සහ පරිසර සංරක්ෂණය අරමුණු කරගනිමින්, ‘ක්ලීන් ශ්රී ලංකා’ වැඩසටහනට සමගාමීව “හුස්මෙන් හුස්මක් විරුතුරු සෙවන” ජාතික රුක් රෝපණ වැඩසටහන පසුගියදා ක්රියාත්මක කෙරිණි. යුද්ධ හමුදාධිපතිතුමන්ගේ සංකල්පයකට අනුව 114 වන පාබල බලසේනා මූලස්ථානයේ බලසේනාධිපති බ්රිගේඩියර් එස්.ජේ.එම්.එන්.එස්. පෙරේරා මහතාගේ මූලිකත්වයෙන් මෙම වැඩසටහන සංවිධානය කර තිබුණි.
මෙම වැඩසටහන මගින් නුවරඑළිය දිස්ත්රික්කයේ යුද්ධයෙන් දිවි පිදූ රණවිරුවන් 577 දෙනෙකු සිහිපත් කිරීම සඳහා ඔවුන්ගේ ළඟම ඥාතීන්ගේ සහභාගීත්වයෙන් රුක් රෝපණය සිදු කෙරුණි. ඒ අනුව 3 (සෙව්) ශ්රී ලංකා සිංහ රෙජිමේන්තුවේ රණවිරුවන් 545 දෙනෙකු සහ 19 ශ්රී ලංකා ජාතික ආරක්ෂක බලමුළුවේ රණවිරුවන් 32 දෙනෙකු වෙනුවෙන් අනුස්මරණ පැළ රෝපණය කිරීම සිදු විය.
මෙම ජාතික වැඩසටහන යටතේ ප්රධාන වැඩසටහන් දෙකක් ක්රියාත්මක විය. එහි ප්රධාන වැඩසටහන මීපිලිමාන කන්දේඇල අධ්යාපනික වන උද්යානයේදී පැවැත්වුණු අතර, එයට නුවරඑළිය දිස්ත්රික් ලේකම්, නගරාධිපති, ප්රාදේශීය ලේකම්වරුන්, වන සංරක්ෂණ නිලධාරීන්, පොලිස් නිලධාරීන් සහ 114 වන පාබල බලසේනාවේ බලසේනාධිපතිවරයා ඇතුළු රාජ්ය නිලධාරීන් රැසක් එක්ව සිටියහ.
දෙවන වැඩසටහන කොටගල ප්රදේශයේදී පැවැත්වුණු අතර, ඒ සඳහා කොටගල ප්රාදේශීය සභාවේ උප සභාපතිවරයා, තලවකැලේ අඩවි වන නිලධාරි, නගරික සංවර්ධන නිලධාරීන්, පොලිස් නිලධාරීන් සහ 114 වන පාබල බලසේනාවේ සිවිල් සම්බන්ධීකරණ නිලධාරීන් ඇතුළු පිරිසක් සහභාගී වූහ.
රට වෙනුවෙන් දිවි පිදූ රණවිරුවන්ගේ අමිල කැපකිරීම් සිහිකරමින්, පරිසර සංරක්ෂණය සහ හරිත අනාගතයක් ගොඩනැගීම අරමුණු කරගත් මෙම වැඩසටහන, විරුවන් වෙත පිරිනැමූ අර්ථවත් සහ ගෞරවාන්විත උපහාරයක් ලෙස සැලකේ.
