ශ්රී ලංකා මාධ්ය ක්ෂේත්රයේ වෘත්තීය ප්රමිතීන් ස්ථාපිත කිරීම සහ මාධ්යවේදීන් නියාමනය කිරීම අරමුණු කරගනිමින් “වරලත් මාධ්ය වෘත්තිකයන්ගේ ආයතනය” පිහිටුවීමට අදාළ පනත් කෙටුම්පත රජය විසින් නිල වශයෙන් ගැසට් පත්රයක් මඟින් ප්රකාශයට පත් කර තිබේ. මෙම නව නීති සම්පාදනය හරහා මාධ්යවේදීන්ගේ වෘත්තීය ගරුත්වය ඉහළ නැංවීමට සහ ආචාරධර්මීය වගකීම් අධීක්ෂණය කිරීමට බලාපොරොත්තු වන බව රජය පවසන අතර, ක්ෂේත්රයේ ඇතැම් පිරිස් මෙය ඓතිහාසික පියවරක් ලෙස අගය කරති.
කෙසේ වෙතත්, මෙම තීරණය සම්බන්ධයෙන් උවිඳු කුලකුරසූරිය සිය ෆේස්බුක් (Facebook) ගිණුමේ සටහනක් තබමින් දැඩි විවේචනයක් එල්ල කර ඇත. ඔහු පෙන්වා දෙන්නේ ජනමාධ්යවේදීන් සිදු කරන්නේ මහජනයාගේ අදහස් ප්රකාශ කිරීමේ අයිතිය ක්රියාවට නැංවීම හෙවත් දේශපාලනඥයන් මෙන්ම මහජනතාව නියෝජනය කිරීමක් බවයි. එබැවින්, මාධ්යයට මෙවැනි ආයතන සාදන්නේ නම් “වරලත් දේශපාලන වෘත්තිකයින්ගේ ආයතනයක්” දේශපාලනඥයන් වෙනුවෙන් නොසාදන්නේ මන්දැයි ඔහු ප්රශ්න කරයි.
පිළිගත් සහතිකයක්, වාර්ෂිකව යාවත්කාලීන වන දැනුමක් සහ පැහැදිලි ආචාරධර්ම පද්ධතියක් මෙන්ම ඒවා උල්ලංඝනය කිරීමේදී ලැබෙන දඬුවම් ආදී කරුණු රැසක් සම්පූර්ණ නොවී හුදෙක් උපාධියක් හෝ අධ්යාපනයක් ලැබූ පමණින් අයෙකු වෘත්තිකයෙකු නොවන බවත්, සැබවින්ම මෙම කාර්යයන් සිදු කළ යුත්තේ රජය නොව මාධ්ය සංගම් විසින් බවත් ඔහු අවධාරණය කරයි. වර්තමාන ස්මාර්ට්ෆෝන් සහ අන්තර්ජාල තාක්ෂණය නිසා ඕනෑම අයෙකුට අදහස් ප්රකාශ කිරීමේ නිදහස ඇති බැවින් මාධ්යවේදීන්ට ඉස්සර තිබූ ඒකාධිකාරී බලය දැන් අහෝසි වී ඇති බව පවසන උවිඳු කුලකුරසූරිය, මෙම නව ආයතනය මහජන මුදල් කාබාසිනිය කරන තවත් එක් ව්යාපෘතියක් පමණක් වනු ඇති බවට අනාවැකි පළ කරයි. රජය විසින් කළ යුතුව තිබුණේ මාධ්ය සංගම් මඟින් පවත්වාගෙන යන ජනමාධ්ය පාසල් ශක්තිමත් කිරීම සහ ඕනෑම අයෙකුට ඇතුළත් විය හැකි කෙටි පාඨමාලා විශ්වවිද්යාල තුළ නිර්මාණය කිරීම බව ඔහුගේ අදහසයි.
