ගෝලීය වැඩිහිටි දුම්කොළ සමීක්ෂණ (Global Adult Tobacco Survey – GATS) නිල දත්ත වාර්තාවලට අනුව, ශ්රී ලංකාවේ වැඩිහිටි ජනගහනයෙන් 20.4%ක් චිත්රපට තුළින් ද, 26.2%ක් විවිධ වෙළඳ දැන්වීම්, ප්රවර්ධන කටයුතු සහ ක්රීඩා අනුග්රහකත්වයන් (Sporting Event Sponsorship) තුළින් ද වක්රව දුම්කොළ ප්රවර්ධනයන්ට සෘජුවම නිරාවරණය වන බව සෞඛ්ය අංශ විසින් නැවත වරක් අනාවරණය කර තිබේ. දුම්කොළ සමාගම් විසින් තරුණ පරපුර සහ වැඩිහිටියන් ඉලක්ක කරගනිමින්, සිනමාව සහ විවිධ ඩිජිටල් මාධ්ය අවභාවිත කරමින් සමාජය තුළ දුම්පානය සාමාන්යකරණය (Normalize) කිරීමට දරන මෙම කූඨ උත්සාහය වහාම වැළැක්විය යුතු බව විද්වත්හු පෙන්වා දෙති. මෙම මාරාන්තික “අඳුරු වෙළඳ උපක්රම” (Dark Marketing) පරාජය කිරීම සඳහා දුම්කොළ හා මද්යසාර පිළිබඳ ජාතික අධිකාරිය (NATA) විසින් යෝජනා කර ඇති නව ඩිජිටල් මාධ්ය දැන්වීම් තහනම් කිරීමේ නීතිමය ප්රතිපත්ති කඩිනමින් බලාත්මක කිරීමේ දැඩි අවශ්යතාවයක් පවතින බව ද අවධාරණය කෙරේ.
ලෝක සෞඛ්ය සංවිධානයේ (WHO) දුම්කොළ පාලනය පිළිබඳ රාමුගත සම්මුතියට (Framework Convention on Tobacco Control – FCTC) ශ්රී ලංකාව අත්සන් තබා ඇති බැවින්, එහි 5.3 වගන්තිය ප්රකාරව දුම්කොළ කර්මාන්තයේ අනවශ්ය මැදිහත්වීම්වලින් (Tobacco Industry Interference) මහජන සෞඛ්ය ප්රතිපත්ති ආරක්ෂා කරගැනීමට ලංකා රජයට සෘජු ජාත්යන්තර බැඳීමක් පවතී. මේ හේතුවෙන්, අන්තර්ජාලය, යූ ටියුබ්, ෆේස්බුක් ඇතුළු සියලුම සමාජ මාධ්ය හරහා කෙරෙන දුම්වැටි ප්රවර්ධන මෙන්ම පොදු ස්ථානවල දුම්පානය තහනම් කිරීමට අදාළව NATA ආයතනය ඉදිරිපත් කර ඇති ප්රගතිශීලී පනත් සංශෝධන වහාම නීතිගත කරන ලෙස මෙරට ප්රමුඛ සෞඛ්ය සංවිධාන සහ සිවිල් සංවිධාන ඒකාබද්ධව රජයෙන් ඉල්ලා සිටියි.
