ලිතුවේනියාවේ පාලක සමාජ ප්රජාතන්ත්රවාදී පක්ෂය, තම සභාග රජයේ සාමාජික පක්ෂයක් වූ ‘නෙමුනාස් ඩෝන්’ (Nemunas Dawn) පක්ෂය සභාගයෙන් ඉවත් කිරීමට තීරණය කර තිබේ. එම පක්ෂයේ නායකයා යුදෙව් විරෝධී ප්රකාශ සම්බන්ධයෙන් වරදකරු වී සිටීම සහ පක්ෂයේ නායකයාගේ අන්තවාදී ක්රියාකලාපය මෙම තීරණයට හේතු වී ඇත.
සමාජ ප්රජාතන්ත්රවාදී පක්ෂයේ නායක මින්දෝගාස් සින්කෙවිසියස් (Mindaugas Sinkevicius) මහතා පවසන්නේ, රජයේ ස්ථාවරත්වය පවත්වා ගැනීම සඳහා මෙම පියවර ගත් බවයි. තුන්-පාර්ශ්වික සභාග රජයේ බහුතර බලය ආරක්ෂා කර ගැනීම සඳහා, ඔවුන් ඉදිරියේදී මධ්ය-දකුණු පක්ෂයක් වන ‘ෆෝ ලිතුවේනියා’ (For Lithuania) පක්ෂය සමඟ සභාගගත වීමට බලාපොරොත්තු වේ.
‘නෙමුනාස් ඩෝන්’ පක්ෂයේ නිර්මාතෘ සහ සභාපති රෙමිජියස් සෙමයිටයිටිස් (Remigijus Zemaitaitis) පසුගිය දෙසැම්බරයේ විල්නියස් අධිකරණයක් විසින් යුදෙව්වන්ට එරෙහිව වෛරය ඇවිස්සීම සහ හොලෝකෝස්ට් ව්යසනය අවතක්සේරු කිරීම සම්බන්ධයෙන් වරදකරු කරනු ලැබීය. ඔහු එම චෝදනා ප්රතික්ෂේප කරමින් අභියාචනයක් ඉදිරිපත් කර තිබුණ ද, මෑතකදී බෙලරුස් දේශසීමාවේ නව හමුදා කඳවුරු පිහිටුවීමේ රජයේ සැලැස්මට විරුද්ධ වීම සහ ඔහුගේ පරිශ්රයන්හි සිදුකළ වංචා විමර්ශන හේතුවෙන් පක්ෂය සභාගයෙන් ඉවත් කිරීමට පාලක පක්ෂය පියවර ගත්තේය.
මෙම වෙනස්කම් සමඟින් ඉදිරියේදී රජයේ කැබිනට් මණ්ඩලයේ ද විශාල වෙනස්කම් සිදුවිය හැකි බව සින්කෙවිසියස් මහතා සඳහන් කළේය. වත්මන් දේශපාලන වාතාවරණය හමුවේ රජයේ ස්ථාවරත්වය සහ පක්ෂ අතර සහයෝගීතාවය අතිශය වැදගත් වන බවත්, ඉදිරි සාකච්ඡා හරහා රජයේ ඉදිරි කටයුතු සම්බන්ධයෙන් අවසන් තීරණයක් ගන්නා බවත් ඔහු වැඩිදුරටත් පැවසීය.
