මෙතෙක් බරවා රෝගය බෝ කරන බවට ප්රචලිතව තිබූ පරපෝෂිතයා වෙනුවට, එතරම් ප්රචලිත නොවූ තවත් නව පරපෝෂිතයෙකු හරහා බරවා රෝගය වැළඳීමේ ප්රවණතාවක් පවතින බව බරවා මර්දන ව්යාපාරයේ අධ්යක්ෂ වෛද්ය එස්.ටී.ඒ.පී. සේරසිංහ මහතා පවසයි. මෙම නව තත්ත්වය පාලනය නොකළහොත් රට තුළ බරවා රෝගය නැවත ව්යාප්ත වීමේ අවදානමක් පවතින බව ඔහු අනතුරු අඟවයි.
මෙම පරපෝෂිතයා හරහා මිනිසුන්ට අමතරව සතුන්ටත් රෝගය බෝ වීමේ හැකියාවක් පවතින බැවින්, අනාගතයේදී සතුන්ට ද ප්රතිකාර කිරීමට සිදු වීමේ තත්ත්වයක් උදාවිය හැකි බව වෛද්යවරයා පෙන්වා දෙයි. පසුගිය වසරේ මෙරටින් බරවා රෝගීන් 34 දෙනෙකු වාර්තා වූ අතර, මේ වසරේ මේ වන විට රෝගීන් 07 දෙනෙකු හඳුනාගෙන තිබේ.
බරවා රෝගය පාලනය කිරීම සම්බන්ධයෙන් අදහස් දැක්වූ සේරසිංහ මහතා සඳහන් කළේ, බහුතරයක් ජනතාව රෝගය තමන්ට වැළඳෙන තෙක් එය පොදු ප්රශ්නයක් ලෙස නොසලකා කටයුතු කරන බවයි. මෙය සියලු දෙනාටම පොදුවේ වැළඳිය හැකි රෝගයක් බව වටහාගෙන, සෑම පුද්ගලයෙකුම වගකීමෙන් යුතුව තම පරිසරය පිරිසිදුව තබා ගැනීමට පියවර ගත යුතුය. දැනට ක්රියාත්මක කෙරෙන තෙදින ඩෙංගු මදුරු මර්දන වැඩසටහනට සමගාමීව, මදුරු උවදුර පොදු ප්රශ්නයක් ලෙස සලකා මර්දන කටයුතු සඳහා සහයෝගය ලබා දෙන ලෙස ඔහු මහජනතාවගෙන් වැඩිදුරටත් ඉල්ලා සිටියි.
