ආර්ථික අර්බුදය පැවති 2022 වසරේදී කොළඹ නගරයේ අඩු ආදායම්ලාභීන් ලක්ෂ එකහමාරකට ආසන්න පිරිසකට රුපියල් 3,500 බැගින් මුදල් ගෙවූ බව පවසමින් කොළඹ මහ නගර සභාව තුළ සිදු වී ඇතැයි සැක කෙරෙන රුපියල් කෝටි 50කට ආසන්න මූල්ය වංචාවක් සම්බන්ධයෙන් පුළුල් පරීක්ෂණයක් ආරම්භ කර තිබේ. කොළඹ මහ නගර සභාවේ දූෂණ සහ වංචා පිළිබඳ සොයා බැලීම සඳහා ජනාධිපති අනුර කුමාර දිසානායක මහතා විසින් පත් කරන ලද ජනාධිපති පරීක්ෂණ කොමිෂන් සභාව විසින් මෙම විමර්ශනය සිදු කරයි.
මෙම මුදල් සැබැවින්ම අදාළ පාර්ශ්වයන් වෙත ගෙවා තිබේද යන්න සහ ඒ සඳහා අවසර ලබා දුන්නේ කවුරුන්ද යන්න සම්බන්ධයෙන් විමර්ශකයින් මේ වන විට දැඩි පරීක්ෂාවක නිරත වේ. කොමිෂන් සභාවේ පරීක්ෂණ ආරම්භ වීමත් සමඟ නගර සභාවේ ඇතැම් නිලධාරීන් රාජකාරියට වාර්තා කිරීම මඟහැර සිටින බවට ද තොරතුරු වාර්තා වී ඇත.
මූලික විමර්ශනවලදී අනාවරණය වී ඇති පරිදි, නගර සභාව සතු වාහන නැවතුම්පොළවල් සහ වැසිකිළි බදු දීමේදී ද විශාල වශයෙන් වංචා සිදුව තිබේ. 2010 වසරේ සිට 2025 වසර දක්වා කාලය තුළ නගර සභාව තුළ සිදු වූ දූෂණ, අනිසි බලපෑම්, නීත්යනුකූල නොවන බඳවා ගැනීම්, ප්රසම්පාදන මාර්ගෝපදේශ උල්ලංඝනය කිරීම් සහ රජයේ වත්කම් අවභාවිත කිරීම් ඇතුළු පුළුල් පරාසයක කරුණු මෙම කොමිෂන් සභාව විසින් පරීක්ෂා කරනු ඇත.
හිටපු මහාධිකරණ විනිසුරු පියසේන රණසිංහ මහතාගේ සභාපතිත්වයෙන් යුත් මෙම කොමිෂන් සභාවේ සෙසු සාමාජිකයන් ලෙස ඊ.ආර්.එම්.එස්.එච්. ඒකනායක සහ විශ්රාමික ජ්යෙෂ්ඨ පොලිස් අධිකාරි ඩී.එස්. වික්රමසිංහ යන මහත්වරු කටයුතු කරති. 2025 දෙසැම්බර් මස නිකුත් කළ අතිවිශේෂ ගැසට් පත්රය මගින් පත් කළ මෙම කොමිෂන් සභාවේ පරීක්ෂණ කටයුතු සඳහා රහස් පොලිස් නිලධාරීන්ගේ සහයෝගය ද හිමි වේ.
