2029 වසරේදී පැවැත්වෙන ජනාධිපතිවරණයෙන් ද අනුර කුමාර දිසානායක මහතා නැවත ජනාධිපතිවරයා ලෙස පත්වන බව ඇමති වසන්ත සමරසිංහ මහතා අවධාරණය කරයි. වත්මන් රජය බිඳවැටෙනු ඇතැයි ඇතැම් පාර්ශ්ව අපේක්ෂා කළ ද, මෙය ජනතා විශ්වාසය දිනාගත්, ජනවරමක් සහිත ශක්තිමත් ආණ්ඩුවක් බවත් ඔහු පවසයි.
ලෝක අර්බුද සහ මැදපෙරදිග යුද තත්ත්වය හමුවේ බලශක්ති සැපයුම සහ නාවික ප්රවාහන ගාස්තු ඉහළ යාම වැනි අභියෝගවලට රජය මුහුණ දෙමින් ආර්ථිකය සාර්ථකව කළමනාකරණය කරමින් සිටින බව ඇමතිවරයා පෙන්වා දෙයි. රජයේ ප්රධාන අරමුණ වන්නේ ඩොලර් බිලියන හතක විදේශ සංචිත පවත්වාගෙන යාම වන අතර, ඒ සඳහා අවශ්ය අරමුදල් මේ වන විටත් ලෝක බැංකුව හරහා ලැබෙමින් පවතී.
ඩොලරයේ අගය රුපියල් 350 සීමාව ඉක්මවා යනු ඇතැයි ඇතැම් පාර්ශ්ව ප්රචාරය කළ ද, එය මේ වන විට රුපියල් 340-345 සීමාවේ ස්ථාවරව පවතින බව ඔහු කියා සිටී. අනාගතයේ මිල ඉහළ යනු ඇතැයි යන අපේක්ෂාවෙන් ඩොලර් මිලදී ගැනීමට ඇති ඉල්ලුම පාලනය කිරීමට, පෞද්ගලික වාහන ආනයනයේදී පනවන තීරුබදු මාස තුනක කාලයකට ඉහළ දැමීමට රජය පියවර ගෙන ඇත.
ඩොලරයේ අගය ඉහළ යාම මත ආණ්ඩු වැටෙන්නේ නැති බවත්, සංචාරක ව්යාපාරය දියුණු කිරීම සහ විදේශ ප්රේෂණ වැඩි කර ගැනීම හරහා රට තුළට ලැබෙන ඩොලර් ප්රමාණය ඉහළ නැංවීමට රජය සැලසුම් කර ඇති බවත් ඇමතිවරයා අවධාරණය කළේය. නැවත ජනාධිපති වීමට සිහින දකින විපක්ෂයේ දේශපාලනඥයන්ට ඇමතිවරයා උපදෙස් දෙන්නේ, එවැනි සිහින දැකීමට පෙර ඔවුන් ප්රථමයෙන් දේශපාලනිකව එකතු වී ශක්තිමත් විය යුතු බවයි.
