විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතාගේ මෑතකදී නිමාවූ නවසීලන්ත නිල සංචාරයේදී ශ්රී ලාංකික සිසුන් සඳහා උසස් අධ්යාපන සහ වෘත්තීය පුහුණු අවස්ථා පුළුල් කරගැනීම සම්බන්ධයෙන් සාර්ථක සාකච්ඡා වටයක් පවත්වා තිබේ. නවසීලන්ත තෘතීයික අධ්යාපන අමාත්ය පෙනී සිමන්ඩ්ස් මහත්මිය සමඟ පැවති මෙම සාකච්ඡාවලදී, ශිෂ්යත්ව පිරිනැමීම සහ ධාරිතා වර්ධන වැඩසටහන් ඇතුළු අධ්යාපනික සහයෝගීතාව ඉහළ නැංවීමට දෙපාර්ශවය එකඟතාව පළ කර ඇත. මෙය ශ්රී ලාංකික තරුණ ප්රජාවට ජාත්යන්තර මට්ටමේ අධ්යාපන අවස්ථා උදාකර දීම සඳහා රජය ගෙන ඇති වැදගත් පියවරක් ලෙස සැලකේ.
නව ද්විපාර්ශ්වික සබඳතා ශක්තිමත් කිරීමේ අරමුණින් සිදුකළ මෙම සංචාරය අතරතුර, වෙලින්ටන්හි නව ශ්රී ලංකා මහ කොමසාරිස් කාර්යාලය විවෘත කිරීම ඇතුළු රාජ්ය තාන්ත්රික මට්ටමේ වැදගත් කටයුතු රැසක් සිදුවිය. නවසීලන්ත විදේශ අමාත්ය වින්ස්ටන් පීටර්ස් මහතා සමඟ පැවති සාකච්ඡාවලදී වෙළෙඳ, ආයෝජන, කෘෂිකාර්මික සහ සංචාරක යන අංශවල ද්විපාර්ශ්වික සහයෝගීතාව තවදුරටත් වර්ධනය කරගැනීමට දෙරටම එකඟ වූ අතර, විශේෂයෙන්ම වෘත්තීය අධ්යාපන අංශයේ ලබා දෙන මෙම සහයෝගය ශ්රී ලංකාවේ මානව සම්පත් සංවර්ධනයට සෘජු ආයෝජනයක් වනු ඇත.
අනාගතයේදී මෙම එකඟතා ක්රියාවට නැංවීම තුළින් ශ්රී ලාංකික සිසුන්ට නවසීලන්තයේ උසස් අධ්යාපන අවස්ථා පුළුල් වනු ඇති අතර, එය දෙරට අතර පවතින රාජ්ය තාන්ත්රික සබඳතාවයේ නව පරිච්ඡේදයක් සනිටුහන් කරනු ඇත. අමාත්යවරයාගේ මෙම නිල සංචාරය හරහා ශ්රී ලංකාව සහ නවසීලන්තය අතර ගොඩනැගුණු මෙම නව හවුල්කාරිත්වය, ඉදිරි දිනවලදී දෙරටේම අධ්යාපනික සහ ආර්ථික අංශවල අභිවෘද්ධිය උදෙසා උපායමාර්ගික පිටුබලයක් වනු ඇතැයි විචාරකයෝ පෙන්වා දෙති.
