අනුරාධපුර ප්රදේශයේදී දැරියක් අපයෝජනයට ලක්වීමේ සිද්ධිය සම්බන්ධයෙන් පවතින නීතිමය ක්රියාදාමයන් සහ විමර්ශනවල ප්රගතිය පිළිබඳව සොයා බැලීම සඳහා පාර්ලිමේන්තු මන්ත්රීවරියන්ගේ සංසදය අමාත්ය සරෝජා සාවිත්රි පෝල්රාජ් මහත්මියගේ ප්රධානත්වයෙන් පසුගියදා රැස්විය. සිද්ධියට අදාළව විමර්ශන කටයුතු සිදුකරන නීතිපති දෙපාර්තමේන්තුව, ජාතික ළමා ආරක්ෂක අධිකාරිය, පොලිසිය සහ පරිවාස දෙපාර්තමේන්තුව කැඳවා තිබූ මෙම හමුවේදී, වින්දිත දැරිය බහුවිධ අධිකරණ ක්රියාවලීන් හේතුවෙන් නැවත නැවතත් පීඩාවට පත්වීම අවම කිරීමට අවශ්ය පියවර ගන්නා ලෙස උපදෙස් ලබා දෙන ලදී.
මෙම නඩුවට අදාළ රස පරීක්ෂක වාර්තා සහ වෛද්ය වාර්තා කඩිනමින් කැඳවීමේ අවශ්යතාවය අවධාරණය කළ මන්ත්රීවරියන්ගේ සංසදය, අනුරාධපුර, අත්තනගල්ල සහ දඹුල්ල යන අධිකරණයන්හි ක්රියාත්මක වන නඩු කටයුතු අතර සම්බන්ධීකරණය ශක්තිමත් කිරීමේ වැදගත්කම පෙන්වා දුන්නේය. විශේෂයෙන්ම වින්දිත දැරියගේ අධ්යාපන අයිතිය, සෞඛ්යය සහ ආරක්ෂාව සම්බන්ධයෙන් රාජ්ය ආයතන දැඩි අවධානයකින් කටයුතු කළ යුතු බවත්, අනුරාධපුර මහේස්ත්රාත් අධිකරණයේ නඩු කටයුතු සඳහා නීතිපති දෙපාර්තමේන්තුවේ සෘජු මැදිහත්වීම තහවුරු කරගත් බවත් සංසදය වැඩිදුරටත් සඳහන් කළේය.
මෙවැනි සංවේදී සිදුවීම් වාර්තා කිරීමේදී දරුවාගේ පුද්ගලිකත්වය සහ ආත්ම ගරුත්වය ආරක්ෂා කිරීම සඳහා මාධ්ය සහ අධිකරණ කටයුතු උදෙසා නව මාර්ගෝපදේශ මාලාවක් සකස් කිරීමට ද සංසදය තීරණය කර ඇත. ළමා අපචාර පිළිබඳ විමර්ශනවලදී මතුවන නීතිමය සහ ප්රායෝගික බාධක මගහරවා ගැනීම සඳහා පාර්ලිමේන්තු මන්ත්රීවරියන්ගේ සංසදය යටතේ පත්කර ඇති අනු කමිටුව හරහා ඉදිරි ක්රියාමාර්ග ගැනීමටත්, ආයතන අතර මනා සම්බන්ධීකරණයකින් යුතුව නීතිය ක්රියාත්මක කිරීමටත් සංසදය සිය දැඩි එකඟතාව පළ කළේය.
