ටිබෙට් ස්වයංපාලන කලාපයේ හිටපු රාජ්ය නායක චේ ඩල්හා (Che Dalha) මහතාව දූෂණ චෝදනාවලට වැරදිකරු කරමින් ජීවිතාන්තය දක්වා සිරදඬුවම් නියම කර ඇති බව චීනයේ නිල ‘ෂින්හුවා’ (Xinhua) පුවත් ඒජන්සිය වාර්තා කරයි.
‘කිෂාලා’ (Qizhala) යන නමින් ද හැඳින්වෙන, ටිබෙට් ජාතිකයෙකු වන මෙම 67 හැවිරිදි හිටපු රාජ්ය නායකයා, චීනයේ නිරිතදිග දේශසීමා කලාපයන් වන ටිබෙටය සහ යුන්නාන් (Yunnan) හි මෙන්ම බීජිං නුවර විවිධ උසස් රාජ්ය තනතුරු දරමින් සේවය කළ කාලය තුළ මෙම මූල්ය වංචාවන් සිදුකර ඇති බව අධිකරණ පරීක්ෂණවලදී අනාවරණය වී තිබේ.
චීනයේ නිරිතදිග චොංචිං (Chongqing) නගරයේ අධිකරණයක් විසින් ලබාදුන් තීන්දුවට අනුව, ඔහු විසින් 1999 වසරේ සිට 2025 දක්වා වූ දීර්ඝ කාලසීමාව තුළ විවිධ නීතිවිරෝධී ක්රමවේද ඔස්සේ චීන යුවාන් මිලියන 158කට වඩා වැඩි (ඇමරිකානු ඩොලර් මිලියන 23.35ක් පමණ) අතිවිශාල මුදලක් උපයාගෙන ඇති බව තහවුරු වී ඇත.
